Germany leh Flick inthen
Team a chetchhiatpui rei tak deuh avangin Germany leh an head coach Hansi Flick an inthen fel.
Pathianni khan international friendly match-ah Germany hian 1-4 tehrengin an mikhual Japan tihte mai mai an hneh lo leh tawh a, an kawtkaia Euro 2024 tournament khel zui mai tur an nih avangin German Football Association (DFB) chuan an boss chhawr lai lakah rinna an nghat zui zel ngam ta lo a ni.
Vawili lai world champion ni tawh Germany hi Flick-a hnuaiah an chetha hlei thei lo a, nikum World Cup-ah pawh hma taka tlain, tunhnai thla engnge-mawzat liamta chhung pawh khan chak an harsat a, federation official-te chuan nakuma tournament an thlen turah hian chetchhiat an hlau a, coach dang zawn an titlu ta a ni.
A thlak tak Joachim Loew hnuaia assistant coach a nih lai 2014 World Cup-ah Flick hian Germany a champion-pui a, mahse, head coach atana lakluh a nih hnua international match tum 17 a khelhpuiah vawili chiah hnehna a chang a, 2022 World Cup-ah group stage pel zo loin a team a tlakpui bawk.
Tunhnaia Germany match hnuhnung pangaah vawili tlawmin, a hnuhnung pathumah an chak lo fai vek bawk a, manager-in a tuar ta a ni.
DFB President Bernd Neuendorf chuan thuchhuah siamin, DFB chuan national team dinhmun a thlir a, nakkum Euro khel tura phurna leh inrintawkna nei turin thil inthlakthleng an mamawh tih a sawi.
Germany hian Euro an thlen dawn avangin qualifying tournament an khelh ve a ngai lo a, mahse, nikum World Cup tir lama an tlak hnu khan he team-ah hian hmasawnna hmuh tur a la awm ta chuang lo a, German fans dawhtheihnain a tlin tawh lo a, DFB lamin chet an thawh ta a ni.
European champion vawithum ni tawh Germany hi tournament an khelh hnuhnung vawithumah round sang kai zo loin an tlafai vek a, chu’ngte chu World Cup hnuhnung pahnih leh Euro 2021-te kha a ni.
Kum 58 mi Flick-a hnuaiah Germany team hian thahrui leh chakna an nei lo a ni ber a, an tlarhnung a pawp tawp thei lo a, tlarhma lamah goal thun an harsat tlawk tlawk bawk.
He thu buatsaih lai thleng hian Flick thlaktu tur an la puang lo a, vawiin friendly match-a 2022 World Cup finalists France an infiampui hunah DFB sports director Rudi Voller chuan team a enkawl ang.
Kum 64 mi Voller hian kum 2000 atanga 2004 chhung khan Germany hi lo enkawl tawhin, Germany striker hlui hi kumin February thla khan German national team director atan ruat a ni a; vawiin France game-ah hian Hannes Wolf leh Sandro Wagner-te’n an puibawm ang.
Wolfsburg khuaa an mikhual Japan an hneh loh hnua petchhuah hlawh ta Hansi Flick hi kum 1926-a Germany manager post an siam hnua Germany boss ban tawk hmasaber a ni!
August 2021-a Joachim Low a thlak hnuah Flick hian Germany chu match 25 khelhpui tlingin, tah chuan match 12 chiah a chakpui.
German FA lamin tunge head coach thar atan an lakluh dawn tih hriat a la nih loh laiin inrinsiakna erawh a intan chho nghal a; kum 2020-21 tawp ruala Flick thlaka Bayern boss rawn ni chho ta Julian Nagelsmann chu rinkai langsarber ni mekin, kumin March thlaa Bayern lamin an ban tak kum 38 mi hian tun thlengin hna nghet vawn a la nei leh ta lo.
Liverpool boss Jurgen Klopp pawh German media sawirik zingah telin, Germany boss hlui Voller ngei pawh lamrik a ni a, mahse, kum 2005 daih tawha Bayer Leverkusen caretaker boss hna a thawh zuai hnu khan manager hna lam hi a khawih leh ta lo.
Hming dang sawirik zingah Austrian mi, Eintracht Frankfurt boss hlui Oliver Glasner a tel bawk.
Germany leh Flick inthen
