Girls’ Hostel leh Residential School state sawrkarin midang kutah hlan

Girls’ Hostel leh Residential School
state sawrkarin midang kutah hlan
Lawngtlai leh Chawngte Girls’ Hostel sak, Lawngtlai-a Residential School leh Chawnhu-a Sadbhav Mandal chu Zirtawpni khan Home minister K Sapdanga’n Lawngtlai atangin a hawng a, Residential School bik hi state sawrkarin Lai Autonomous District Council kutah a hlan tih a sawi.
Chhim lam chu Mizoram kawtchhuah a ni tan mek tih Home minister hian a sawi a. Hemi kawnga lo inbuatsaih that a tul, tiin, a bikin Lawngtlai mipuiin tih tur an ngah tih a sawi. Ram leh hnamah chian a pawimawh hle tih a sawi a. hnam ziarang chawikan kawngah harh thar turin a sawm.
LADC-ah sawrkar ngelnghet tak a awm a pawimawh a, chu chu mipui duhdan pawh a ni, tiin, chak taka LADC kal zel a beisei tih a sawi a, Mizoram sawrkar nen chak zawka thawk tlang zel turin duhsakna a hlan tih a sawi bawk.
A hawnnaah hian Lawngtlai East bialtu MLA, adviser to chief minister Dr Lorrain Lalpekliana Chinzah leh Lawngtlai West bialtu MLA C Ngunlianchunga te chu khualzahawm an ni a. LADC chief executive member C Lalsawmzuala chuan Residential School Lawngtlai hlan an ni chu ropui a tih thu sawiin, Mizoram sawrkar leh State Sports Council chungah lawmthu a sawi a. A enkawl kawngah LADC chuan theihtawp a chhuah dawn tih a sawi a ni.
Residential School Lawngtlai hi Ministry of Minority Affairs hnuaia PMJVK Scheme 2019- 2020 atanga cheng nuai 3461.70 hmuh niin, work order amount chu nuai 3149.84 a ni. Contractor chu DJ Consultancy Services, Mission Veng Aizawl leh Decor India Guwahati niin, 2021 March 8 khan hna tan a ni a, 2025 September 8 khan zawhfel a ni.
Sadbhav Mandap sakna atan hian Ministry of Minority Affairs hnuaia PMJVK Scheme 2018- 2019 atangin cheng nuai 236 hmuh niin work order amount chu nuai 214.74 a ni. M/s Excell Consultancy Services, Mission Veng-in a thawk a, 2021 December 19-ah tan niin, 2024 February 15-ah zawh a ni.
Residential School hi LADC hnenah, Girls’ Hostel Lawngtlai hi Govt. Lawngtlai College hnenah, Girls’ Hostel Chawngte hi Govt. Chawngte College hnenah hlan niin, Sadbhav Mandap chu ‘Management Board’ kutah hlan a ni.