World Cup 2026 khelh mekah Thawhlehni zan khan Portugal chu a vawi hnihna atan an inlan a, Uzbekistan an hmachhawn. DR Congo lakah goal a thun loh vanga sawisel hlawh Cristiano Ronaldo a kir a, goal hnih a thun. Ronaldo lansarhna inkhelah Portugal in 5-0 ngawtin Uzbekistan an sawp a, last 32 an hnaih. Group K a inkhel dangah Colombia in DR Congo an hneh a, last 32 an lut.
Portugal an sel a maw?
World Cup 2026 ah champion tura rinkai, player nei tha rual ber leh squad chha ber ang hiala ngaih Portugal hian bul an tan tha lova, an hneh ngei tura tlang rin DR Congo nen 1-1 in an inhnehtawk ringawt. Kum 58 hnu a World Cup khelh phak ve leh nawlh DR Congo laka an chak zawh loh tumin Portugal player te an khel tha lo rual thup a, team angin an thawk ho tha tawk lova ngaihna lian tak a awm. Player ngaihven hlawh Cristiano Ronaldo-a’n goal a thun lova, a lansarh tawk loh vangin neuh neuh a tam zui leh zual. Bal an pe tam lova hriat an nih vangin Bruno Fernandes leh Joao Neves ten dem an hlawh leh zual a, an ni pahnih hian social media-ah beih an tawk nasa hle. An team boruak a chhe hle nia ngaih a nih vangin Ubekistan an hmachhawn tur pawh huphurh rukna lian tak a awm.
An inkhel ta
Team ngaihven hlawh leh sawi sep pawh hlawh tak Portugal hian a vawi khat nana World Cup khel phak ve nawlh; Asia khawmuala awm Uzbekistan chu NRG Stadium, Houston-ah an hmachhawn. Khelmualah selna anka an dawn zawng zawngte dawt thu leh thu vuvuk mai a nihzia an lantir a, team inlungrual leh induhsak tawn tak an nihzia an lantir. An laka beisei ang inkhel hmuhnawm leh game mawi an lantir a, phu takin hnehna an chang zui ta bawk.
Uzbekistan lakah point thum hmuh ngei tuma inlan Portugal in an khel tha viau a, goal pawh an thun hma hle. A hun tha neih hmasak hlah bawk mah se hmunawl zawng thiam leh awmhmun dinka awm Cristiano Ronaldo chuan João Cancelo siamsak tha tak chu minute 6-na lekah hnaite atangin a pet goal a, hmahruaina goal a thun. Uzbekis tan laka goal a thun chiah hian major tournament-a khelh 10 lai goal a thun theih tawh loh chu a titawp a, mutan leh a kawlpui a kheng thla.
Hma takah goal an thun vangin Portugal an phur a, inrintawkna sang zawk nena inlan chhunzawmin, goal pawh an thun belh leh thuai. Free kick an hmuh atangin an team boruak a tha tih leh an induhsak tlang a ni tih an tilang. Box bul lawka freekick an hmuh chu Cristiano Ronaldo-a’n a pet ngei dawn niin a lang a, Portugal player te pawh Ronaldo tan an insiam renm a, Uzbekistan wall siam an din thuah ve bawk. Khawvel mipui leh Uzbekistan player te ngei pawhi Ronaldo-a’n a pet ngei tura an ngaih thup maiin defender Nuno Mendes chuan rin loh takin a pet thut a. Mendes hian hmunawl laiah fuh taka thawlh lutin minute 17-naah an goal hnihna a thun.
Goal hnih chhuah tawh mah se Uzbekistan in an si phurh sut tur khawpin an khingpuite an nawr let zo lo. |ha ang reng fein goal thun bawk mah se VAR rawn a nih hnuin hnawl a ni leh ta si a, an si phurh an sut thei lo. Goal an chhuah deuh thuak vangin Portugal an tang mar tar leh a, goal thun belh ngei tumin an khingpuite an nawr. Portugal hian an khingpuite nawr let thutin goal thun theihna hun remchang an nei. Cristiano Ronaldo chuan a la tlan chakzia leh a finishing a la tawihzia pho lanna hun remchangah a hmang a, minute 36-naaah fing taka pet goal in, an goal hnihna a thun. Ronaldo hian hattrick siam theihna hun remchang nei bawk mah se chawlhlawk hmain goal a thun belh thei tawh lova, Portugal in 3-0 ngawta hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Portugal in goal hnih an thun belh leh. Bruno Fernandes corner pet fing tak atangin Roberto Martinez-a team in goal an thawkchhuak zui leh a, Uzbekistan defender Abduvohid Nematov chuan minute 60-naah an lamah a ti-goal a, Portugal goal lina a thunsak.
4-0 ngawtin hmahruai tawh mah se Portugal an inthlahdah mai lova, goal thun belh ngei tumin tan an khawh. Bench atanga lut Rafael Leo chuan minute 87-naah pui zetin a pet goal a, an goal ngana leh an goal hnuhnung ber a thun. Rafael Leo goal thun hnuin goal dang a luh belh thei tawh lova, Portugal chuan Uzbekistan lakah 5-0 ngawta hnehna changin, phu takin point thum an hmu.
Ronaldo a lo kir e!
DR Congo lakah vawi 25 chauh ball dekin, shot on target nei miah lo bawk a, beisei a phak loh em vangin Ronaldo-a’n sawisel a hlawh a, a elpui dang tantuten an deuin, an eu tel bawk. Hmuhsit leh elrelna karah huai taka dingin a thochhuak leh a, record thar nen World Cup-ah ngei a kir a, goal hnih a thun.
Player ropui, tantu leh dotu ngah em em Ronaldo hian Uzbekistan lakah goal hnih thun a, hattrick siam theihna hun tha a nei bawk mah se uiawm takin a puitlin zo lo. Hattrick siam ta lo mah se record thar duhawm tak a hnutchhiah ta tho thung. Uzbekis tan laka goal a thun chiah khan World Cup-ah vawi ruk (World Cup 2006, 2010, 2014, 2018, 2022 leh 2026) ah inlan a, goal thun vek thei record a siam a. World Cup-a goal thun thei upa ber dawttu a ni tel bawk. Footballer zawng zawng zinga goal thun hnem ber Ronaldo hian World Cup-ah goal 10 thun tlingin, Protugal tan World Cup-a goal thun hnem ber a ni thar ta bawk a, Portugal tan World Cup a goal 9 thun Eusèbio record a khum.
Player ropui Cristiano Ronaldo chu a lalna khelmualah ropui takin a kir leh a, Uzbekistan laka goal hnih a thun hmangin a ropuina a tilang nawn leh. Ronaldo hian Camera hmaah ‘Ka lo kir e’ ti lo pawh ni se ropui zawkin a lo kir leh a, khawvel in a goal hnih thun a hmu a, a lawmpui.
Colombia an tlang
Group K a inkhel dangah Uzbekistan laka point 3 hmu tawh Colombia chuan nilaini zing khan harsa takin DR Congo an hneh a, last 32 an lut chiang nghal.
Point thum hmu tah Colombia hian DR Congo lakah chak a, last 32 luh chian nghal ngei tumin tan an khawh. An khingpui lakah an khel tha viau a, goal pawh an thun teuh thei hle. Copa America 2024 finalist Colombia hian hlauhawm an siam mawlh mawlh a, an shot tha leh hlauhawm tak tak chu DR Congo si nghak Mpasi-Nzau chuan dangin a tihthlawnsak mawlh mawlh a, an team a chhanhim fo. Mpasi hian khel tha viau mah se player 10 ten an dan zawh loh chu a dang vek sek bik nang si lova, minute 76-naah Daniel Muñoz chuan Colombia tan goal a thun ta nge nge. Inkhel hmuhnawm takah Colombia in 1-0 in hnehna an chang a, last 32 an inhlangkai ta a ni.
An dinhmun leh an hmabak
Group K a miten vawi hnih theuh an khel ta a, point ruk hmuin Colombia in hma an hruai a, point li hmuin Portugal in an dawt. DR Congo in point khat an hmu tawh a, Uzbekistan in point an la hmu lo. Point la hmu lo Uzbekistan pawh hi an la tla chiang bik lo.
Group K a mite hian Inrinni zing dar 5:00 ah group match hnuhnung ber khelin an inchingfel dawn. Portugal leh Colombia ten group champion an inchuh dawn a, inkhel hautak leh pawimawh an hmachhawn a ngai dawn. Colombia tan draw a tawk viau a, last 32-a khingpui hautak pumpelh turin Portugal in chak ngei an mamawh. Lehlamah beiseina tlem la nei DR Congo leh Uzbekistan ten inkhel pawimawh tak an hmachhawn dawn bawk.
Goal 2 nen Ronaldo a lo kir e
