Saudi Pro League-ah Cristiano Ronaldo thlipui a tleh kal zel a, Inrinni khan 5-1 zeta Al-Hazm an sawpna inkhelah Al-Nassr tan goal khat thawh lehin, inkhelh banah Portuguese hian a career-a goal 850 a khawl tlin thu leh a goal zat chu la chhiar kal zel tur a nih thu a sawi!
Season kal laiah kum 38 mi hian Saudi club tan game nga khelin goal ruk a thun tling leh tawh a, league game bik chu vawili niin, a goal thun tawh parukte hi league goal vek a ni.
Portugal forward bakah Liverpool forward hlui Sadio Mane pawhin Al-Nassr tan goal khat thawh ve bawkin, league match li an khelh tawhah Al-Nassr hian tlawm an la pumpelh vek a ni.
Nikum December thlaa Manchester United chhuahsana Arab ram a pan hnuah Ronaldo hian game 30 atangin goal 26 a tilut tling tawh a; December 2021 khan United thuam a inbel laiin a career-a a goal 800-na khungin, foot-baller mipa zinga inter-national goal thun hnem-ber ni turin goal 123 a ngah tling tawh bawk.
Chutiang mi chuan Inrinnia a club vawn lai a chakpui leh hnu lawk khan social media-ah post a siam a, “Team khelhthat dang kan hlawkpui leh ta! Hma kan sawn zel. Career goal 850 career leh la chhiar zawm tur,” tiin.
Kha result an neih leh hnu khan Al-Nassr hian point liin hmahruaitu Al Hilal SFC an la pha lo.
Aleksander Mitrovic-a hat-trick hmangin Zirtawpni khan league hmahruaitu Al-Hilal hian 4-3-in Al-Ittihad an hneh a, mualneitu team tan Karim Benzema chuan goal khung bawk mah se a team tlawm tur a chhan zo lo.
Saudi Pro League match dangah Moussa Dembele goal hnih thun hmangin Al-Ettifaq chuan 3-1-in Damac an hneh a, a zawna match hnih an chak zawh loh hnuah Steven Gerrard-a team-in hnehna lawm tur an nei ve leh ta a ni.
Roberto Firmino, Gabri Veiga, Riyad Mahrez leh Allan Saint-Maximin kawltu Al-Ahli an talbuai a, Al-Fateh chuan 5-1 zeta sawpin hmahruai theihna hun tha an bawhpelh.
Goal 850-a lungawi la tum lo Ronaldo
