Bayern Munich a zawm hnua Bavarians damna tling chho nghal England forward Harry Kane chuan Inrinni zana an club-in 3-1-a mualneitu Mainz 05 an hneh tumin goal khat a thawh leh a, ti hian, a club thar tana Bundesliga game riat a khelh tawhah goal kua khung tlingin, Kane aia Bundesliga goal kua thun tling hmasa dang chu Gert Dorfel, Paco Alcacer leh Erling Haa-land-te chiah an ni a, anni pa-thum hian goal kaw khung turin game riat aia tlem an hmang.
Mainz muala hnehna nuamsa an chan tumin minute 11-na lekah Kingsley Coman chuan Sane thawhrah atangin German cham-pion hmahruaina goal a khung a; minute nga a kal leh tihah Leon Goretzka siamsak atangin English striker Kane chuan mikhual team hmahruai nawnna goal a thawh.
Chawlhlawk hma hlekin Anthony Caci chuan phurawm zawka chawlhlawk an hman theihna turin home team siphurh pakhat zawk a sut then.
2nd half tir lamah Kane-a goal siamsaktu Goretzka khan a ma pualin goal khat a thun ve a, nuam-sain Munich club-in an mikhual-na atangin point thum an hawpui.
Nizan result hriat hma thlengin khelh riata point 20 neitu Bayern hian Bundesliga table-ah pathumna an luah chho a; Inrinni zan inkhel danga chak ve bawk chunga pahniha chho VfB Stuttgart lak-ah point khata hniamin, Inrinni veka Wolfsburg khelmuala 2-1 hnehna changa hmahruaitu nihna chang thar Bayer Leverkusen nen point hnihin an inthlau thung.
League season kal laiah Thomas Tuchel-a team hi Leverkusen leh Borussia Dortmund-te nen la tlawm lo awmchhun an ni a, he stage-ah hian season kalta nena khaikhinin PSG hi point ngain an tha zawk.
Kumin nipui insuan hun laia Tottenham chhuahsana Germany pan ta Kane-a goal thun tluan chanchin hi Bundesliga season kal mekah news lian ni mekin, a goal thun theih hmang hian Bayern pawhin 2016-17 hnu lama domestic campaign bul an tan fuh ber hun an tawngbua tiin a sawi theih ang.
Goal khung thulh thei lo Kane!
