Goal-veng ropui Buffon chawl ve ta nge nge…

A chuai thei lo hlen dawn emaw ti hnuah Italian goal-veng thiam hmingthang Gianluigi Buffon chuan kum 28 chhung tehreng a lo bun tawh kutkawr a hlip hlen ve ta nge nge!
Goalkeeper ropui tia hriat kumkhua tawh tur Buffon hian kum 45 mi niin Nilaini khan professional football khelh a bansan thu hi puangin, club leh ram tana mellung a phun tawh zozaite chu a duhtawk ve ta em em niin a lang!
Kum 2006 World Cup-a Italy champion-puitu hian Juventus thuam a inbel chhungin Serie A title 10 a la tling a, uaithla lam a nih hnuah Paris St Germain tan Ligue 1 title pakhat a hlawhchhuak leh hram bawk.
Chutiang mi chuan thuchhuah siamin, “A tawp ta e! (Football hian) Engkim min pe a, kei pawhin wngkim ka hlan ve bawk che. Kan pahniha kan tih a ni,” tiin football a mangtha.
Buffon goalkeeper piang chhuak tawh zinga Italy tana goal veng hnem ber niin, ram tan match 176 a khel tling a; leilunga keeper tha berte zinga chhiar tel niin, a bultanna Parma thuam inbel chung ngeiin a career a zialfel a, a club vawn hnuhnungber ni ta hi Italian second tier club niin, a season hnuhnung berah khan hliam avangin a talbuai a, season tharah khawvelin mual chhunga a ball man lai a hmu dawn ta lo a ni.
Buffon hian kum 2001 khan Parma atangin Juve a zawm a; a career tam ber chu Turin club-ah hian hmangralin, PSG tan kum 2018-19 khan a khel zuai a, chumi hnuah Turin-ah bawk kirlehin, June 2021 khan a hmangaih hmasa ber Parma bawk a vuan leh a, Nilainiah a chawlh thu khawvel hriatah a puangzar ve ta nge nge a ni.
A career chhui chipchiar leh hlek ila.
Buffon hian kum 1991 khan Parma youth system bel chungin a football zinkawng a zawh tan a; a tirah chuan midfield-ah a tlan phawt a, a pumraw ruakhau vang leh a fukein a zir em avangin goal ven lamah a kal zui ta a ni.
Kum 1995 November thla khan rawlthar kum 17 mi lek ni chungin Parma tan a Serie A debut a nghakchhuak a, chumi tum chuan AC Milan nen goal awm loin an inhnehtawk.
Metre 1.92 zeta sang Buffon hian record siamin Italian top fligh match 657 a khel tling a, kum 2003 khan UEFA Club Footballer of the Year atan thlan a lo ni tawh nghe nghe.
Russia ram 2018 World Cup-a an ram an inlan phak loh hnuah international football a chawlhsan a, tunah club football pawh a chawlhsan ve ta a ni.