Sawrkar enkawl industrial training institute atanga zirchhuakte tana bul an tanna tura inelna, Labour Employment Skill Development & Entrepreneurship (LESDE) department buatsaih ni thum awh ‘Kawtchhuah – 2024’ chu Thawhlehni atang khan Govt. Aizawl ITI ah neih a ni.
He intihsiak hawngtu LESDE secretary Lalramsanga Sailo chuan ‘Kawtchhuah’ hian mahni kutkawih leh themthiamna hmanga eizawnna bultanna chawilar chu a tum ber a ni, tiin, ITI atanga zirchhuak tawh, an kal zelna tur kawng sahkuak pui a, tiphurtu leh chona thar petu atana duan a ni tih a sawi.
“Kawtchhuah tih hi Mizo pi leh pute hnathawk tur leh an thiamthil hmang tangkai tura an innghah khawmna hmun a ni a, he hmun atang hian an hnathawhna tur theuh an pan thin angin, he Kawtchhuah programme hi ITI atanga zirchhuakten hmang tangkai turin ka duh a ni,” a ti.
Sawrkar laipui Ministry of Skill Development & Entrepreneurship (MSDE) hnuaia Skill Strengthening for Industrial Value Enhancement (STRIVE) project hnuai atanga buatsaih niin, STRIVE hian ITI tihchangtlun hi a tum ber a ni tih a sawi bawk.
Kawtchhuah 2024 hi govt. ITI pass chhuak tawhte tana eizawn bul tanna tur nei tha thlanchhuahna niin, intihsiaka tel tur hian dilna 44 a lut a. Heta tang hian mi 30-in intihsiak hmachhawn tura inbuatsaihin, skill competency test leh an ruahmanna (business plan) sawifiah a ni. Endiktute endikna atanga titha thlanchhuahte hian sumfai cheng nuai khat theuh an dawng anga, a pumpuia lawmman atan hian nuai 15 dah a ni.
Govt ITI zirchhuakte inelna Kawtchhuah 2024 nei mek
