Greece ram kangin khawpui tiderthawng mek
Greece khawthlang lama khawpui lian chu a bul lawka ram kang inman kai chak tak avangin a derthawng mek a, hetih lai hian Europe chhim lam ram tam tak chu khaw lum uchuak tak leh thli na tak tlehin a tuam mek.
Thli na tak tlehin Greek khawpui lian ber pathumna, mi 2,00,000 chenna, Patras daia ram kang chu a chhem alh chak hle a, naupang damdawi ina mite telin mi chengte an insaseng a, van pawh chhum dumin a a tuam vek.
Ni hnih lek chhungin Achaia region-a hectare 10,000 dawna zau a kang tawh.
Khaw eng emaw zat rauhsan a ni a, in leh sumdawnna hmun bakah customs yard-a car 500 chuang nen lirtheite a kang chhia.
Nilaini khan Patras kawtthlerte chu a reh hle a, mi cheng thenkhat chuan ngawi rengin an khawpui bul hnai tlanga ram kang chu an thlir.
Thli na tak tlehin khaw lum lam chu 38°C a kai a, khawpui chu meikhuin a tuam a, mi tam takin thawk lama harsatna an tawh avangin damdawi in an pan.
Thuneitute chuan a bul hnai khua, mi 7,700 chennaa mite chu inthiarfihlim tura tiin Nilaini khan khaw pahnihah inralrinna an tichhuak bawk.
Greece hmun dang, Zante leh Chios thliarkara vaukamah ram kangin a hnaih zel avangin coastguard-ten mi eng emaw zat an chhanchhuak.
Greece hian kang thelhtu 4,800 chuangin hmun 20 chuanga ram kang an thelh mek pui turin EU hnenah water bomber a dil.
Hetih lai hian Europe chhim lamah khua a lum hle a, Portugal atanga Balkans ram thlengin ram a tihkan phah.
Spain-ah civil mi leh thelh tura inpeten Nilaini khan ram kang thelh mekin a zawna ni 10 nan khua a lum leh hle bawk a, a hma ni chiah khan 45°C a kai.
Sorkar weather agency chuan Spain pum deuhthaw chu lum hle tur leh ram kang mai thei a nih thu an sawi a. Khaw lum uchuak tak hi Thawhtanni thleng turin an sawi lawk a, an rama khua a lum rei ber a ni thei dawn.
Thuneitute chuan kuminah hmun 199-ah ram kang tawhin hectare 99,000 dawna zau a tuam tawh a. Nikum August thle laihawl thlenga kang tawh zat let a ni tawh a, tam tak hi hal nia rin a ni.
An thenawm, Portugal-ah pawh kang thelhtu 1,800 chuangin hmun ngaa ram kang nasa an thelh mek a, pakhat hi khawchhak lam, Trancoso-a tek tla atanga chhuak a ni.
Albania-ah pawh hmun 24-ah ram kangin defence minister chuan ‘chawlhkar khirh tak’ a nih thu a sawi a, ram lailia khuate chu insaseng turin an ti.
Italy-ah chuan ni nga hnuah Mount Vesuvius-a ram kang chu an thunun thei tawh a; mahse, khawpui 16-ah khaw lum tur an la sawi lawk a, Florence-ah chuan 39°C a kai a. Pope Leo pawhin ni a sat em avangin kar tin St. Peter’s Square tuala mipui hmaa hun a hman thin chu in chhungah a sawn.
Britain-ah pawh tun nipuia khaw lum thawh lina thlengin 34°C kai tura rin a ni a, damdawi in thuneitute chuan hriselna khawih theih niin an sawi.
Meteorologist-te chuan sik leh sa uchuak tak hi mihringin a siam sik leh sa inthlak nasa avanga na leh daih rei niin an sawi.
Greece ram kangin khawpui tiderthawng mek
