June 11 hi thing leh mau leh ramngaw humhalh pawimawh zia inzirtirna ni – Green Mizoram Day atan hman a ni a. District headquarters tin bakah hmun dang thenkhatah he ni denchhen hian hun hman niin, thing phun a ni.
Kumin thupuiah “I nunna atan thing phun rawh” tih hman a ni a. Aizawlah chuan Berawtlangah hman niin, hmanpuitu minister C Lalsawivunga chuan Green Mizoram Day puala thing tiak phun runpui buatsaih a ni thin chu lawmawm a tih thu a sawi a. Awmze nei zawka thing phun a tul, tiin, a hmun azira tui hna siam thei chi leh rah tlan chi thing phun tura ruahman a tha tih a sawi.
He ni denchhen hian Zokhawsanga Assam Rifles Complex-ah thing phun a ni.
Green Mizoram Day hi Green Aizawl Day-a bul tan niin, Mizoram pum huap hmalakna a nih theih nan kum 1999 atangin Green Mizoram Day tia thlaka hman thin a ni. Kum 2014 khan Mizoram sawrkarin June 11 hi ‘Green Mizoram Day’ ah a puang a ni.
Green Mizoram Day hman tan kum, 1999 atanga 2023 thleng khan thing tiak 45,63,326 phun a ni tawh a. Kum 2013 atangin thingphun ho hi a nung zui em tih chhinchhiah tan a ni.
Kumin Green Mizoram Day denchhen hian district pum huap leh Aizawl district bik tan kangmei ven kawnga thawk tha hnenah lawmman hlan a nih bakah thing phun lama thawh hlawk mimal hnenah lawmman hlan a ni bawk.
Kangmei veng tha district:
1-na – Kolasib District
2-na – Lawngtlai District
3-na – Mamit District
Aizawl district-a kangmei veng tha khua:
1-na – Lamchhip
2-na – Kepran
3-na – Seling
Mimal, thing phun tha:
1-na PC Malsawma, Dinthar Veng West Phaileng
2-na PC Lalrinzuala, Maite
3-na H Zakunga, Sihphir Venghlun