Gross state domestic product (GSDP) chungchangah tuna chief minister ni ta Pu Lalduhoma’n MLA inthlan hmaa a sawi dan leh tuna budget a pharh laia a sawi dan a inang lo tih MNF party chuan sawiin, a dawt sawi a langchhuak tih an sawi.
MNF Gen. Hqrs. thuchhuak chuan, ZPM chu inthlan campaign laiin lalna leh thuneihna an duh luatah MNF sawrkar chu a chhe thei ang berin an bei thin a. Engkim chhe vekah an puh tih sawiin, ‘MNF sawrkar kalta an beihnaa an dawt sawi a langchhuak mek zel a. An leader Pu Lalduhoma ngeiin, Tv interview leh mipui hmaah Mizoram sum dinhmun chhiat zia sawiin GSDP pawh -9.6 a ni a ti thin a. Hmaichhanah mithiamin a sawi dik lo tih an hrilh hnuah pawh aw ki sang tak hmangin a la sawi lui tlat zel a nih kha,’ a ti.
Nimin maia budget a pharhnaah thudik tak chu a lo lang ta a, amah ngeiin a dawt sawi thin chu a rawn inphawrh mualpho ta tih MNF hian sawiin, ‘Budget a pharhnaah Finance minister a nihna angin kum 2022 – 2023 chhunga GSDP chu 10.14 a nih thu a rawn sawi leh ta a, kum 2023 – 2024-ah chuan 10.55 a nih rin a nih thu a sawi ta hial a. Hetiang hi thil awmzia a nih avangin ZPM-in kan ram kaihhruai hna an thawh mekah an inzawrhna ang lo takin ram tan beisei an sang lo hle a. A tuk lawka lang leh mai tura dawt sawi thin hi, chief minister leh a kaihhruai party hian sim tawh se kan duhin kan chah a ni,’ MNF thuchhuah hian a ti.
GSDP zatah Pu Duha dawt sawi a langchhuak – MNF
