“Guerilla Fighter atangin Chief Minister”
MNF president, chief minister hlui Zoramthanga’n zalenna suala an rammut lai atanga remna ziah hnua an lo chhuah hnu, chief minister a nih thlenga a chanchin a ziahna lehkhabu “Guerilla Fighter atangin Chief Minister” tih chu Thawhtanni khan MNF hruaitu, deputy chief minister hlui Tawnluia’n a tlangzarh.
Mizo Hnam Run-a lehkhabu tlangzarhnaah a ziaktu Zoramthanga chuan, a tirah he lehkhabu hi “Ka Autobiography” tih mai a tum laiin, Sap tawnga buatsaih saktu Penguin company lamin “From Rebel to Chief Minister” ti turin thu an rawn a. Ani’n zalenna sualtu an ni a, hel an ni loa, chutiang chu a duh loh thu a sawi hnu ah, ‘freedom fighter’ tih zawk an rel laiin, tuna a bu hming “Guerilla Fighter atangin Chief Minister” tihah hian an sirtluk ta tih sawi.
“Miin an chhiarin hreawm an ti palh ang tih ka hlau hle a, mimal rilru ti na zawngin thu pakhatmah ka ziak loin ka hria a, a taka ka paltlang thudik tak, ka experience atanga ka ziah a ni,” a ti.
Zalenna an sual laia harsatna an paltlang dan hrang hrang sawiin, a tulna avanga East Pakistan leh Europe ram hrang an fan chanchin a sawi bawk.
Lehkhabu tlangzarhtu, MNF rammut lai underground sawrkara Army Chief Tawnluia chuan, a tan chuan he lehkhabu tlangzarhtu nih chu ‘tawnloh sa bawp’ a ni ringawt tih a sawi a. Mizo hnam movement-ah a tir atanga tel, vawiin thlenga la dampuitu, kum 36 chhung MNF president ni mek Pu Zoramthanga lehkhabu ziah chu thang leh thar lokal turten Mizo nationalism tundinna atana tangkai taka an hman atan a duh tih a sawi.
“Pu Zoramthanga’n Mizo hnam tana zalenna sual laia sulsutu pawimawh tak a lo nih tawhna leh Mizoram-in chief minister kan neih tawha thawk tha ber a lo nih tawhna hi thangtharten an theihnghilh ngai loh tur a ni,” a ti.
He lehkhabu hi Sap tawnga tihchhuah a ni tawh a. A ziaktu Zoramthanga chuan, a beisei phak bakin Mizoram mai ni lo, ram pawn lam thlenga an hlutsak chu lawmawm a tih thu a sawi. Thangthar awm zel tur tan Mizo hnam movement chanchin mamawh lakkhawm theihna tur ‘Mizo Hnam Movement Dictionary’ tangkai tak a nih ngei a beisei tih a sawi bawk.
“Guerilla Fighter atangin Chief Minister”
