Tunhma lama Fifa World Cup knockout match hnehna la chang ngai reng reng lo Norway chuan Thawhlehni zan khan team khawng zet Ivory Coast lakah extra time khelh ngai lo zawngin 2-1 hnehna an chang a, hun pangngai tawp hma minute li chiah awm tawha Norwegian-ho chakna goal kha an forward palian Erling Haaland-a chhuihluh niin, tun tournament kal laia a goal nga thunna a ni ta.
Dallas Stadium-a mipui 69,665 pungkhawm hmaah first half chhungin goal a lut zo lo dawn emaw tih hnu chawlhlawk dawn minute 39-ah captain Martin Odegaard-a chhawpsak atangin Bundesliga club RB Leipzig winger Antonio Nusa chuan Norway hmahruaina goal a thun a, half time-ah Scandinavian ramin si khat faiin hma an hruai theih phah.
Norway hmahruaina goal a thun laia kum 21 leh ni 74 chiaha upa attacking midfielder hriam zet Nusa kha an ram tana major international tournament-a goal khung thei naupang ber a ni nghal.
Premier League club Arsenal captain ni bawk Odegaard kha World Cup match khelh hmasak vawi thuma assist nei kim vek thei player pathumna a ni.
African-ho si phurh hi second half minute 74-ah Premier League club dang Manchester United tana khel mek Amad Diallo chuan sutin, bench atanga khelmual lut Diallo first eleven chang lo khan mak tih a hlawh viau a ni.
Extra time a hnai thuak tawh tihah Patrick Berg-a ball pek tha lutuk hmangin ven loh Haaland chuan Norway chakna goal ni zui ta a chhuihlut a, an ram chanchina a vawi khatna atan World Cup knockout match hnehna changin, last 16 lamah Brazil lakah fiahna hautak zawk an hmachhawn zui leh ang.
Manchester City striker Haaland hian Norway tan a zawnin competitive international match 13-ah goal a khung kim vek a; tun World Cup kal meka top scorer inchuhna kal mekah pawh goal nga thun tlingin, hmahruaitu Lionel Messi lakah goal khat chauhin a hniam ta.
Tarlan tak angin, Ivory Coast manager Emerse Fae khan defensive 4-1-4-1 formation a chhawpchhuah miau avangin Old Trafford lama winger leh attacking midfielder hial ni pha Amad Diallo kha bench-ah a dah phawt.
Coach-in tlarhnung ven lam a ngaipawimawh hle chung pawha an si phurh an sut mai theih chuan tak loh hnu khan second-half sub Amad kan hmu ta nge nge a; kum 23 mi hi Ivorian-ho kirleh beiseina siamsaktu rawn ni nghalin, second half laihawlah an si phurh a sut a, Norway fans an reh duk!
A hun takah an beiseina lian Haaland chuan an ram chhanin goal a khung leh a, Norway lawng lianin round of 16 an invai thleng ta phawt.
Tun kha Ivory Coast tana World Cup knockout match an khelh vawi khatna a nih rualin Norway tan pawh kum 28 chhunga kha stage an thlen leh vawi khatna chiah a ni ve bawk.
Norway leh Brazil inkhela chak zawk zawk hian quarter-final lamah England an hmachhawn thei dawn – nizan result tarlan hman lohah Three Lions-in DR Congo an paltlang zo a nih chuan…
Viking row thlipui
Norway inkhelh tuma an player-te leh stadium chhunga an fans chet dan kha kan hmu thin ang a, hmanlaia an lawng mi rothap pui pui lawngkar lai hlimthla an lantir a, a huhoin an huiha thum dut dut a, World Cup knock out match hnehna an chan vawi khatna lawma an ‘Viking row celebration’ pawhin Dallas khawpui bakah an lo chhuahna khawpui Oslo a nghawrnghing dur dur a nih kha!
Ivory Coast leh an ram inkhel kha Oslo lamah pawh a huhoa enna hmun tam takah siam niin, hnehna an chang chiah kha fans sang tam tak an ram khawpui kawtthlerah an fuankhawm a, an chak lawm dan thulkhung Viking row ngei mai hmang khan chak an lawm leh.
Thawhlehni zana an chakna inkhel kha an ram mipui zat maktaduai nga leh a chanve atanga maktaduai hnih chuangin an thlir angin an rama he tournament pechhuaktu commercial broadcaster TV2 chuan an chhut a, tunlai chu Norwegian fans puja a la fuh tluang tlat!
Haaland a hero tlai!
