Krismas leh kumthar vuakvetah halpuah leh halmawi lam khap hneh ngei tumin sawrkarin hma a la dawn tih Home minister K Sapdanga chuan a sawi a. Sawrkar hnathawkte phei chu inhnamhnawih lo turin a chah. Amah kawmtu thuthar thehdarhtute hnenah Home minister chuan, hunpui laia halpuah/ halmawi hal lo tura inngenna chu kum dangah hlawhtling zo lo \hin mah se, kuminah Krismas, kumthar leh Puja vuakvetah a hlawhtlin theihna turin kawng hrang hranga theihtawp chhuaha khap hlawhtlin ngei tum a ni tih a sawi.
Kum danga a hlawhtlin loh chhan zingah – khap thu puan tlai lutuk vangte, ram pum \anrual \hat tawk loh vangte, khapna dan bawhchhiate hremna a awm chuan loh vangte a ni \hin tih a sawi a. Kuminah erawh September 9-ah khapna thu rel a ni a, zawm tura inngenna thu uar taka puanzar zui a ni, tiin, khapna thupek zawm lote hremna dan pawh khauh taka kenkawh ngei tum a ni tih a sawi.
“Dan bawhchhia hremna hi a khauh tak avang leh, khauh taka kenkawh tum a nih avangin, sawrkar hnathawkte phei chu inthiarfihlim ngei tura hriattir an ni a. Heng thil phurtu lirthei chu document hrensak, driving licence cancel sak thlengin hrem an ni ang,” K Sapdanga chuan a ti.
Khapna thupek zawm a, heng thil hi phur lut loa zuar lo turin sumdawng zawng zawng ngen leh hriattir an nih bakah mi tinin thupek hi ngaipawimawh tura ngen an ni tih a sawi.
Mizoram State Pollution Control Board zirchian danin 2023 hunpui vuakvet kha kum dang zawng aiin hal lam hi a nasa a, boruak tehnaah pawh a bawlhhlawh dan a sang hle a, boruak bawlhhlawh kaihhnawih nia hriatah nunna chan pawh an tam ber tum a ni tih an sawi thu a sawi bawk.
“Khapna thu kan chhuah tlai deuh a. Tlin lawm leh tlin loh vanga inrunluihna pawh a ni thei bawk ang,” tiin Home minister hian zawhna a chhang.
Kuminah chuan hriat loh palh awm lo turin local/ village council leh tlawmngai pawl bakah kohhran tin \anrualpuiah a sawm tih K Sapdanga hian a sawi a. Mahni huam chin \heuhah uar taka puangzar turin a ngen tih a sawi.
“Halpuah/ halmawi avanga nunna chan an awm loh a, damlote tan phurrit siamsak an nih loh a, boruak chhia siam belh a nih lohna turin mi tinte \anrualpuiah ka sawm a ni,” a ti.
Khapna thupek hi district magistrate ten an puang ang a, thla 6 chhung huam thei a ni.
Khapna thupek hian halpuah, halmawi, sky lantern, silai lem mu nei chite a huam a. Ram dang atanga lakluh, kawl, zawrh leh hman khap a ni.
Khapna dan bawhchhia chu BNS Sec 223 hmangin kum khat thleng lung in tan leh sumfai Rs. 5000 thleng chawitir theih an ni.
Dan hluiah khapna bawhchhia hremna hi thla 6 thleng lung in tan theih leh Rs. 200 chawi theih a ni a. Kum kaltaah case 5 ziah luh niin, mi 9 man an ni a; mi 7 chu thiam loh chantir an ni tawh.
Tun a\angin state ramri check gate hrang hrangah police leh sawrkar department dang bakah tlawmngai pawlte uluk taka duty tura hriattir an ni a. Bungraw phur lirtheite bakah private leh sawrkar motor thlenga a \ul anga endik tum a ni.
Hal lam khap hneh ngei kan tum: Home Minister
