Hamas te sum leh pai dinhmun tha reng

Hamas-te chu Gaza-ah Israel-in nasa taka a bei chungin an sum dinhmun chu a la ngelnghet hle tia sawi a ni a. Indonain awh rei mah se sum leh pai lamah chuan an buai mai dawn lo tia sawi a ni.
Israel Prime Minister Benjamin Netanyahu chuan Palestinian Islamist movement chu chhut chah dap a intiam a.
Tun hnai thla hnih chhung indona kalpui tawhah Gaza-ah nunna chan 18,800 vel an awm tawh tiin Hamas te enkawl Gaza Health Ministry chuan a sawi a. October 7 a Hamas ten Israel an beih khan mi 1,139 tihlumin a tam ber chu civilian te an ni a, lung in tang 250 nei bawkin a then chu inthleng tawn tawh niin Hamas te hian mi 129 an la kawl mek anga ngaih a ni.
Israel chuan sipai chakna hmangin bei chiam mah se Hamas revenue stream chu a chhu chat mai mai thei dawn chuang lo tia sawi a ni a.
“Sum lamah chuan Hamas te hi an ngelnghet a ni” tiin Jessica Davis, president of the Canadian group Insight Threat Intelligence chuan a sawi.
“Tun hnai kum sawm chhung velin finance network tha zet leh ngelnghet tak an siam a ni” tiin a sawi bawk a. Hamas te chuan investment ti nasain ram hrang hrangah sum lakluhna an nei tha a ti bawk.
An sum lakluhnate chu ‘business tenau atanga real estate’ thlengin Turkey, Sudan leh Algeria thlengin an inzarpharh vek tiin a sawi bawk a. Hei mai bakah hian Hamas te hian donation an dawng nasa a ti bawk.
Sum lam tam zawk lakluh nan system tha leh danglam tak an nei a ni, tiin Yitzhak Gal, Israeli expert on Palestinian economy chuan a sawi a, money exchange system tha tak neiin Turkey, UAE, Europe leh United States thlengin an inzarpharh vek a ti bawk.
“Huangtau taka an che chungin Hamas te hian khawvel pum huapin anmahni thlawptu an la nei zel tho” tiin Lucas Webber, co-founder of specialist website Militant Wire chuan a sawi bawk.
Hamas te thlawpa sum leh pai petu ber erawh Iran a ni a. Iran hian kum khatah Hamas te hnenah hian $70 million atanga $100 million a pe thin anga ngaih a ni a. Sum a pek nan hian cryptocurrency, pawisa fai leh foreign bank atanga transfer bakah informal ‘hawala’ system te a hmang ber tih a ni bawk.
Iranian tena ralthuam an pekna chu Egypt kaltlangin leiverh hmangin Gaza leh Sinai thlaler ah pekluh thin a ni a, tunah chuan hei hi danchah mek a ni ta thung.
Kum 2006 a Hamas tena Gaza inthlana chakna an chan hnuah Gaza territory enkawl nana sum leh Hamas te sum bik danglamna chu a fiah tawh lo tih a ni bawk a.
“Engkim Hamas te kutah a lut a, annin thi tur leh nung turah thutlukna an siam mai” tiin Gal chuan a sawi bawk a.
Gaza Strip-in budget 2.5 billion a neih atanga 1.1 billion chu Palestinian Authority ten Israel nena inremna neia an thawh a ni, tiin Gal, Mitvim think tank a specialist chuan a sawi a.
International community te chuan United Nations Relief and Works Agency for Palestine Refugees (UNRWA) kaltlangin Palestinian refugees te chu chhawmdawlna an pe bawk a.
Qatar chuan sorkar hnathawk heng doctor leh zirtirtute hlawh tum thungin thla tin Gaza Strip a mirethei bakberh 100,000 chuang te hnenah $100 theuh pe thinin kum 2012 atanga 2021 inkar khan Qatar sum pek chu $1.49 billion a tling a ni.
Kum 2021 khan gas lama hausa em em Qatar hian an capital ah Hamas political bureau an inbun chu United States in a pawmpuina hnuaiah a rtem ti a. Coastal Palestinian territory tan hian $360 million kumtin a pe a. Mahse, Qatar chuan Hamas te chu sum lamah a pui lo a inti thung.
“Qatar-in Gaza Strip tana tanpuina a pek tin te hi Israel, US leh UN te nena inpawhtlang taka sawihona hnuaiah vek a ni” tiin Qatari official te chuan an sawi bawk a. “Heng tanpuina tin eitur, damdawi leh fuel tin te pawh Gaza a luh hma in Israel paltlang vek a ni” a ti bawk.
Kar kalta khan Qatar kaihhruaia hostage negotiator leh diplomat Abdulaziz Al-Khulaifi chuan Gulf Emirates chuan Gaza a la pui zel dawn a ti bawk a.
October thla khan Washington chuan Hamas mi pawimawh 10 te a hrek a, mahse, Hamas kawng engkima hrek vek chu thil theih loh tawp anga ngaih a ni. “Hamas te sum lakluhna danchah vek tum chu thil theih loh a ni ang,” tiin Davis chuan a sawi bawk a.
“Tihbuai a ni thei a, an fund te pawh tihtlemsakin an awm thei a, an network te pawh tihbuai theih a ni ang a, mahse infrastructure an nei reng ang a chhan chu thlawptu an nei reng tlat” tiin a sawi bawk.
Gal chuan Hamas te sum dinhmun chu Gaza hma lam hun awm dan turin a hril tur thu a sawi a. “Indona tawp se, nunphung pangngaia let hunah zawhna awm thei chu Hamas te financing system hi chhunzawm a ni ang nge a danglam dawn tih a ni,” tiin a sawi a.
“Gaza hi refugee camp lian tak a ni tawh a, tuin nge ei leh bar, tui leh heng refugee te awmna tur ngaihtuah sak ang, Hamas te nge pawl dang, ruahmanna dang a awm thei em?” tiin zawhna a siam bawk.