Hamas-te chuan Gaza-a inkahhai awm theih nana US President Joe Biden ruahmanna siam chu chhanletna siam ta in, Israel lakah permanent ceasefire an phut bur thung.
Thuchhuah an siamah Hamas leh an thahwpui Palestinian Islamic Jihad (PIJ) te chuan inremna a awm theih nan an inpeih thu an sawi a.
US President Joe Biden ruahmanna siam chu UN security council pawhin Thawhtanni zan khan pawmpuia thlawpin kar ruk chhung inkahhaina kalpui ni se chu chu inkahhaina tluantlingin zui bawk se an ti.
Qatar leh Egypt te US te nena Israel leh Hamas tena inremna an neih theih nana palaite chuan Palestinian group te chuan an chhanna an thehluh tawh thu an sawi chiang zui bawk a.
Hamas-te chuan Gaza-a indona chu tihtawp nghal vek an ngiat thu sawiin, “Palestinian mipuite tana pawimawh ber chu tuna Gaza inbeihna hi tihtawp nghal bur a ni,” tiin Hamas leh PIJ te chuan an sawi.
Hei mai bakah hian indona tihtawp a nih theih nana inremna siam tura inbiakna neih an inpeih tiin an sawi bawk.
White House national security spokesperson John Kirby chuan Hamas tena chhanna an siam chu lawmawm a tih thu sawiin US official te chuan an zirchiang mek tiin a sawi bawk.
A hmain US Secretary of State Antony Blinken chuan Israeli Prime Minister Benjamin Netanyahu chuan Gaza ceasefire plan chu a pawmpui thu a sawi nawn thu a sawi bawk.
President Biden rawtna siamin a tirah kar ruk inkahhaina kalpui phawt ni se, chutih chhung chuan mitang inthleng tawn ni se tih a ni a.
A thawh hnihnaah Hamas tena mitang an kawl zawng zawng te chhuah zalen vekin Israel sipai te pawhin Gaza chhuahsana ‘permanent’ ceasefire a awm theih nan hmalak zui zel ni se tih a ni bawk.
Netanyahu chuan a war cabinet chuan ruahmanna siam chu an pawm tiin a sawi a. Mahse, a cabinet a far-right member te chuan Netanyahu an inkahhai US rawtna siam chu a pawm a nih chuan sorkar an thlawpna hnuhdawhah an vau thung a.
US ruahmanna siam chu Hamas te laka tlawmna angah an ngai.
Hamas ten rawtna thehlut ve ta
