Hamas ten US rawtna her danglam

US Secretary of State Antony Blinken chuan Hamas leader tena Gaza inkahhai awm theihnana US ruahmanna siam an zirchian hnuah nasa taka an her danglam hnuah ‘tun hi indawn kual hun a ni lo’ tiin a sawi.
Doha a reporter tena an kawmnaah Blinken chuan thil thenkhat Hamas tena an rawtte chu kalpui theih a nih rualin a thente chu thlak danglam theih loh a ni a ti a. Mahse, US leh mediator Qatar leh Egypt te chuan inremna a awm theih nan an bawhzui ang a ti bawk.
Thawhlehni khan Hamas te chuan inkahhai a awm theih nana hmalakna chu lawmawm an tih thu sawiin mahse Israel chuan permanent ceasefire leh Gaza atanga inhnuhdawh vek a kalpui tur a ni an ti a.
Israel sorkar chuan Hamas te thusawi hi chhanletna a siam lo va, mahse, a pawm dawn chuang lova ngaih a ni thung.
Israel prime minister Netanyahu pawhin mipui hriatah US President Joe Biden rawtna chu a pawm thu a la sawi lo hrim hrim bawk. Mahse, Blinken chuan Benjamin Netanyahu chuan Jerusalem a meeting an neihnaah a ruahmanna a pawm thu a hrilh nawn tiin a sawi thung.
UN Security Council pawhin US President ruahman resolution chu an pawmpui thu an lo sawi tawh bawk a ni.
US Secretary of State Blinken chuan Qatar ram a tlawh a, hetah hian Qatari Prime Minister leh Foreign Minister Sheik Mohammed bin Abdul Rahman Al Thani nen inbiakna an nei a.
Qatar hian pawimawhna thuk tak neiin kum sawm chuang fe chu Hamas political office awmna ni tawhin Israel nena inremna a awm theih nana palai ber a ni bawk.
Blinken chuan Hamas tena inkahhai awm theih nana ruahmanna an siam an her danglam chu a lawm lem lo hle thung a. “Inremna awm mai thei a ni a, ruahmanna chu May 6 a Hamas tena ruahmanna an thlen nen a inzawl em a ni, he ruahmanna hi khawvelin a thlawp a ni a, Israel in a pawm tawh a, Hamas te hian pawm e ti ve mai tur an ni,” tiin a sawi a.
“Mahse, Hamas te chuan kar hnih dawn an kawl a, chumi hnuah an thlak danglam zui a. A hmaa an pawm sa tawh te an pawm lo thar leh a. Hetiang a nih chuan Hamas tena indona an chawhthawh hi a kalzui zel ang a, mipui tam zawkin an tuar ang a. Palestinian-in an tuar ang a, Israelis te pawhin an tuar ang,” tiin a sawi bawk.
Blinken chuan Hamas tena an demand leh thlak danglam te chu a sawi chaung lo thung a. A sawi lan awm chhun chu Gaza beihna tihtawp hmak leh Gaza atanga Israeli sipai zawng zawngte lakchhuah a ni thung.
Hamas political bureau Izzat al-Rishq chuan an chhanletna siam chu thil pawimawh chungchuang leh inremna a awm theih nana pawimawh a ti a. Israeli prime minister office chuan engmah official a chhanletna a la siam lo thung a.
Mahse a hnuah Israeli official pakhat chuan Hamas te chuan ‘tehna pawimawh bul bera ngaih te an thlak danglam’ tia sawiin ‘President Biden an mitang te chhuah zalen dan tur a ruahman chu an hnawl’ a ti bawk.
A hnuah Hamas te chuan inremna a awm theih nan theihtawp an chhuah thu sawiin Blinken chu nasa thei ang bera Israel te nawr turin an ti bawk.
Beisei angin thil kal lo mah se Blinken chuan US, Qatar leh Egypt te chuan inremna a awm theih nan an beizui ang a ti a. “Harsatna awm te chinfel theihah ka ngai a, a pawimawh ber chu Hamas te thutlukna a ni” tiin a sawi.
“Indona thlengah thil a inthlak danglam tawh a, he indona tihtawp duhna a lian ber a ni” tiin Blinken chuan a sawi bawk a. Indona tihtawp mai bakah Gaza siamthat leh chu thil pawimawh a ni a ti bawk.
Gaza buaina hi Hamas ten nikum October 7 a Israel luta mi 1,2000 chuang thata mi 250 chuang mitang tura an hruai atanga intan niin Israel-in a beihletnaah Gaza-ah nunna chan 37,200 chuang an awm tawh a ni.
Nikum November thla khan inkahhaina rei lo te siam niin Hamas te chuan Israeli mitang 105 an chhuah a, Israel in Palestinian mitang 240 chhuah thungin, tunah hian Israeli mi 116 vel chu an la kawl mek a, chung zinga 41 chu thi tawha ngaih an ni bawk.