LESDE minister Lalnghinglova Hmar chuan sawrkar laipuia Ministry of Skill Development and Entrepreneurship (MSDE) hotute chu ‘hand holding policy’ kaihhnawihah an kawm.
Ningania minister of state for MSDE Rajeev Chandrasekhar a kawmnaah Mizoram sawrkar tharin skill development lama hma lak a tum tak tak chu lawmawm a tih thu central minister hian a lo sawi a. Thil kalphung pangngai pet pet ni lo, mahni state mil project siama an thehluh chuan a hlawhtlin theih nan theihtawpa a lo puih tur thu a hrilh. Sawrkar laipuiin skill development leh entrepreneurship lama hma a lak nasat thu sawiin, hei hi India ram puma kalpui tur a nih rualin, mahni state awmdan leh rammite thiamna azirin an siamrem thiam tur a ni tih a sawi bawk.
Chief minister Lalduhoma hoin ‘hand holding policy’ kalpui turin committee hranpa din a nih tih Lalnghinglova Hmar hian sawiin, chumi kawngah chuan MSDE chu nasa taka an behchhan tur thu a hrilh.
Mizoram LESDE minister hian department hotu dangte nen MSDE secretary Atul Kumar Tiwari an kawm bawk a. Mizoran sawrkar tharin ‘hand holding policy’ kalpui a tumnaah MSDE ministry chu an innghahna tur a ni tih sawiin, chief minister leh MSDE secretary inkawm tawhna bawhzuia kal an ni tih a sawi.MSDE secretary chuan Mizoramin hma sawn a tum tih a taka a lan thu leh hun inhnaih taka minister-in tum hnih lai a office a tlawh chuan an ti tak tak tih a lantir tih sawiin, an theihna zawnah pui turin an tlanchhe dawn lo tih a lo hrilh.
MSDE hnuaia sum tâng awm ang ang pek chhuah vek an tum a; sawrkar kum a tawp hmaa tih tur hmanhmawh sawi a ni bawk. Mizoram LESDE department lamin hmachhawp an neih an thehluh chu enfel a, tihhlawhtlin an tiam a, thil thenkhat erawh sawrkar laipui kalphung nena herrem a tul tih an sawi.
Minister hi LESDE secretary Lalramsanga Sailo leh director Angela Zothanpuii ten an zui a ni.
Hand holding policy atan MSDE ministry hotu kawm
