Harry Styles ‘Kiss All the Times. Disco, Occasionally’ a No.1

Harry Styles ‘Kiss All the Times. Disco, Occasionally’ a No.1
Harry Styles album thar, a solo studio album palina ‘Kiss All the Time. Disco, Occasionally’ chu Billboard 200 (US albums) chart No.1-ah a debut a, heti hian a solo studio album pali a tlangzarh tawh te chu chart No.1-ah an la debut thei a ni. A solo studio album hmasa ber ‘Harry Styles’ chu 2017 khan No.1-ah a debut a, Fine Line (2019), Harry’s House (2022) te pawh No.1-ah a debut tawh a ni.
Harry Styles hi mipa solo artist zingah album hmasa pali chart No.1-a debut pui vek thei pahnihna a ni a, hetiang tithei zaithiam dang chu DMX niin, ani hian 1998 leh 2003 inkar khan a album panga te chu No.1-ah a debut pui vek a ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Harry Styles “Kiss” album hi kar khat chhungin 4,30,000 an hralh thei a, chung zinga 2,91,000 chu album tak tak hralhna niin, streaming atangin 1,38,500 (on-demand official stream maktaduai 140.31) a tling a, album-a hla a mala hralhna atangin 500 a tling thei bawk.
Bruno Mars album ‘The Romantic’ chu 80,000 hralh lehin, No.1 atangin No.2-a a tawlh a, he album hi kar kalta khan chart No.1-ah a rawn debut a nih kha. Chart No.1 hlui dang pathumin dawtin, Morgan Wallen “I’m the Problem” chu 76,000 hralh lehin No.3-ah bawk a la awm a, Bad Bunny ‘DeBi RiRAR MaS FOToS’ chu 67,000 hralh lehin No.2 atangin No.4-ah a tawlh a, Don Toliver ‘OCTANE’ chu 60,000 hralh lehin No.4 atangin No.5-ah a tawlh ta bawk.
Olivia Dean ‘The Art of Loving’ chu 58,000 hralh lehin No.5 atangin No.6-ah a tawlh a, top 10-a lang dang zawng chu No.1 hlui vek niin, Megan Moroney ‘Cloud 9’ chu 40,000 hralh lehin No.6 atangin No.7-ah a tawlh a, Taylor Swift ‘The Life of a Showgril’ chu 39,000 hralh lein No.7 atangin No.8-ah a tawlh a, Morgan Wallen “One Thing at a Time’ chu 37,000 hralh lehin No.14 atangin No.9-ah a kai thar leh ta a, SZA ‘SOS’ chu 36,000 hralh lehin No.12 atangin No.10 a kai thar ve leh ta bawk.