Pathianni zing atang khan kum khata Grand Slam khelh hmasak ber Australian Open 2024 khelh tan a ni a. Pathianni a inkhel ngaihven hlawh takah champion lai Novak Djokovic chuan fiahna hautak a paltlang. Grand Slam a champion ngun ber ni mek Djokovic hian Grand Slam pathumah vawi 90 chin chak thei record thar a siam nghal bawk.
Australian Open ah vawi 10 zet champion tawh a, champion nawn leh ngei tuma tan khawh Novak Djokovic hian qualifier paltlanga inelna hmachhawn ve thei hram Dino Prizmic hmachhawnin bul a tam. World No. 155 ni mek Prizmic lakah awlsawm taka chak tura ngaih ni mah se harsa takin a chak thei hram chauh a. Australian Open first round a khelh rei ber ni nghal; darkar li leh minute khat chhungin 6-2 6-7 (5-7) 6-3 6-4 in hnehna a chang hram a, harsa takin first round a paltlang.
Djokovic lakah beisei phak baka khel tha Dino Prizmic hi French Open 2023 Junior champion a ni a. Djokovic a hmachhawn hi Grand Slam a hma-chhawn vawi khatna a ni. Tennis player ropui bera ngaih Djokovic a chhaih buai thei viau a, hma bak eng tak a neia ngaih niin, first round ah tla nghal mah se ngaih-ven a hlawh thar a, a hming a chher lian tho thung.
Prizmic lakah harsa taka chak Djokovic hi Australian Open-ah vawi 90 a chak tling chiah a. Wimbledon leh French Open-ah vawi 92 ve ve chak tling tawh bawkin, Grand Slam hrang pathumah vawi 90 chin chak tling thei awmchhun a ni a, hnuhma lian dang a hnutchhiah. Nole hi US Open-ah vawi 88 a chak tawh bawk a. Grand Slam paliah vawi 90 chin chak vek thei awmchhun nih a hnaih leh viau bawk.
Pathianni a inkhel dangah champion tura rinkai zinga mi Andrey Rublev chuan Thiago Seyboth a hneh bawk.
Harsa takin Novak Djokovic a chak
