Paris Masters khelh mekah World No. 1 Novak Djokovic chuan ningani zan khan harsa takin hnehna a chang a, quarter-final a lut. Djokovic a chak lai hian champion tura rinkai zinga mi Jannik Sinner chu kal zel thei lovin a inhnukdawk thung.
He hmuna vawi ruk champion tawh Djokovic hian Tallon Griekspoor a hmachhawn a, inlehthalna lian a thleng teuh hle. Player ropui Djokovic lakah tlawm ngei tura ngaih Griekspoor hian rin loh takin a khel tha viau a, set khatnaah break a neih chhawr tangkaiin, set la hmasa zawkah a tang ta hial. Set khatna a lak hnuin set hnihnaah pawh a khel tha zui viau a, tie-break khelh a ngai hial. Tie-break-ah erawh Djokovic a che ropui ta viau thung a, 7-2 a chungnungin set a la let. Set khat ve ve an lak hnuin deciding set-ah Djokovic a chungnung zui leh a, 4-6 7-6 (7-2) 6-4 a hnehna changin quarter-final a inhlangkai zui ta a ni. Djokovic hian quarter-final-ah khingpui hautak a nei dawn a, Holger Rune nen semi-final luh an inchuh ang.
Ningania inkhel dangah tunlaia chetha tak Jannik Sinner chuan Mackenzie McDonald 6-7 (6-8) 7-5 6-1 hneh mah se hliam a nei zui a. Quarter-final hmachhawn zui lo turin a inhnukdawl.
Harsa takin Novak Djokovic a chak
