A nu leh pain an thihsan a, sum lama harsatna namen lo a tawh bakah a la inhliam zui a, chuti chung chuan a coach leh a patea (uncle)-te nupa puihnain rawlthar kum 18 mi Isak Malsawmtluanga chuan Manipur-ah weightlifting training a chhunzawm tang tang a, Khelo India Tribal Games-ah hlawhtlinna changin gold medal hial a awrh ta!
Raipur, Chhattisgarh-a March ni 26-29, 2026 chhunga 1st Khelo India Tribal Games Weightlifting zawh tak men’s kg 60-ah Ramhlun Vengthar rawlthar Malsawmtluanga hi inlanin, Mizoram tan gold medal a hlawhchhuak ta a ni.
Hriat theih chinah Mizoram atangin gold la thei pahnih awmin, silver pahnih leh bronze pakhat an la bawk.
Mizo weightlifter Isaka hian nu leh pa a chan piahlamah a training laia a hnungzang a tihnat avangin a buai hle a, mahse, a tumruhna bakah Imphal khawpuia awmhmun khuar Sports Authority of India hnuaia National Centre of Excellence (NCOE) thawktute puihnain training a chhunzawm tang tang a, weightlifting-a hlawhtlinna lian hmasa a sualchhuak ta a ni.
Champion weightlifter a nih hma hian rawlthar kum 16 mi a nih laiin kum 2018 khan bike accident-ah a pa a chan a; rilru lama a tawrhna piahlamah taksa hliamin a tlakbuak zui leh a, chuti chung chuan beidawng duh loin theihtawp a chhuah a, hlawhtlinna sang zawk a beisei mekna kalkawngah hnehna pawimawh a chang.
Snatch section lama pahnihna a nih hnuah Isaka hi mittlung takin clean and jerk-ah a inlan zui leh a, belhkhawma kg 235 chawiin, gold medal a hlawhchhuah rual hian hun khirhkhan ber a paltlang lai pawha amah thlawpa chelh tlat thintu a patea nen lawm avangin an inpawm vawng vawng!
A pa thih kum khan Isaka hian weightlifter ni turin training bul a tan ve chiah a; khatih lai khan an chhungkuaa mipa awmchhun a nih avangin chhungkaw chawmtu atan a theih ang anga sum thawhchhuahna zawn chhungkuain an mamawhna a san zual em em lai a ni a, chutih laia training zawm tura an in lum chhuahsan chu thutlukna harsa tak a ni.
Khatih lai boruak kha SAI media-in an kawmnaah sawichhuakin, “Hun khirhkhan takin min tlakbuak laiin ka naupan tet atanga min enkawltu coach Sir Sawma khan min fuih sauh sauh a, bansan duhna thinlung hial ka put laiin weightlifting chhunzawm turin min fuih a,” tiin a tana coach hlutna a sawi chhuak.
Kum 2024 a herchhuah chuan Himachal Pradesh-a Youth National Championship an nghah tumin silver medal a hlawhchhuak a, mahse, tah chuan a harsatna a la tawp awzawng lo a, a nu cancer an hmuhchhuah kum a ni leh ta tlat!
Chu natna avang chuan sum lama an chhungkaw harsatna a zual a, rilru lamah nasa zawkin a tuar zui bawk.
Hun harsa tak a paltlang zel theihna chhan bulpui a pateate nupa hi mi hausa an ni bik lo a, Aizawl Ramhlun Vengthara restaurant lian lem lo behchhana ei zawng ve mai niin, anni puihna hmang chuan a zirlai leh weightlifting training chu bahlah loin a chhunzawm theih phah a ni.
A nu chuan a natna tuarchhuak zo loin a kalsan leh ta zel a; chu mi chungchang chu sawiin, “Nu leh pa meuh han chan chu chhungrilah hian a na vawng vawng a, weightlifting chawlhsan mai ka duh hial a, mahse, ka patea leh ka coach-te chuan chhunzawm zel turin min hmin thei hram a ni,” a ti.
Kum 2024 atang khan Isak-a hian NCOE-ah training tha zawk zawmin, heti pah hian Aizawl-a Indira Gandhi National Open School behchhanin zirna pangngai a chhunzawm bawk.
Harsatna karah pawh beidawng loa a beih hram hramna chuan rah tha a chhuah zel a, nikum khan junior level-ah silver medal dang hlawhchhuak lehin, kum 2025 vek khan National Weightlifting Championship-ah bronze medal a awrh bawk.
Tun Khelo India Tribal Games hmachhawn tura a inbuatsaih lai khan training laiin a hnungzang a ti na a, a coach chuan hliam buaipuiawm zawkin a tlakbuak hlauhthawnpuina avangin tournament khel lo mai turin thurawn a pe a, mahse, Mizo rawlthar hian kha leh chen a lo thlir tawh leh inbuatsaihna a lo kalpui tawhte chu a thlawna liamtir a tum awzawng lo a, tumruhna leh chhelna, huaisenna leh tlawm tumlohna nen chawi-zawl a chuangchhuak a, a career-a hnehna lian ber a sualchhuak ta a ni!
“Ka pa thih hnu khan ka pate hian competition ka hmachhawn tumin min kalpui fo thin a, tuntum pawh hian min awmpui tlat a, medal ka hlawhchhuah rual khan a banin min chawikang a, khatih laia ka hlimzia mai kha aw…”
Result hriat theih chin
60 kg: Isac Malsawmtluanga, Gold Medal
NCOE, Imphal – Ramhlun Vengthar
65 kg: Laithanpuia, Silver medal
MSSC Weightlifting Academy
Sairang Dinthar Veng
71 kg: Silvan Beihrothathlo, Gold medal
Khelo India (KIC), Pune
Siaha, Chhuarlung
79 kg: Lalfakawma, Silver medal
MSSC Weightlifting Academy, Ainawn Veng
Jacob Vanlaltluanga, Bronze medal
KIC, Pune – Ainawn Veng