Prime minister hlui, Sheikh Hasina-i haw leh tur boruak avanga amah thlawptuten buaina, bomb puak leh thil hal an tih nasat avangin Bangladeshi sorkar chuan ram pumah venhimna tikhauh tharin Nilaini khan paramilitary sipai tam zawk an tir chhuak.
August, 2024-a paih thlak a nih hnua Dhaka atanga India-a tlanchhia, Hasina-i hi kum hnih chuang hnuah haw leh a tum mek a, December thlaa haw turin passport thar leh identity card dilna a thehlut tawh.
A ngenna hi an ram sorkar chuan a hnawlsak a, hei vang hian a kaihhruai party, an rama awm an phal tawh loh, Awami League member leh thlawptute chu kawtthlerah chhuakin lungawi lohna an lantir.
Kar hmasa khan party hian chawlhkar khat awh turin lungawi loh lantirna leh Hasina-i haw tur an thlawp tih lantira vantlang inkhawm leh kawng zawh huaihawt tur a nih thu an puang a, ram pumah Ningani hian lockdown kalpui an tum bawk.
Police chuan ni 10 liam ta chhung khan district 28 velah tualchher bomb puak leh lirthei hal tam tak a thleng tih an chhinchhiah a, police leh civil mi inhliam pawh an awm nual tawh niin tual chhung chanchinbute chuan an tar lang bawk.
Thawhlehni zan tlai tawh takah khan rorel lai, Bangladesh Nationalist Party (BNP) mi pakhat chu Hasina-i awmna, Gopalganj district-a amah thlawptute pun khawmna bulah mi tu tih hriat lohten an that niin police-in an sawi.
Hemi zan vek hian Dhaka-a Cultural Affairs Minister Nitai Roy Chowdhury-a chenna inah tualchher bomb a puak a. Gopalganj-a BNP MP leh BNP mite dawr eng emaw zat hal a ni bawk tih police hian an sawi bawk.
Nilaini tuk khan bus company helper chu chhim lama Pirojpur districk-a bus pahnih halnaah a thi bawk niin thuneituten an sawi.
Thawhlehni kha kum khat kal taa tual chhung court-in kum 2024-a zirlaite kaihhruaia amah duh lohna an lantirnaa telte na taka a beih let avanga Hasina-i thi tura a hremna ni champha a ni.
November 10 atang khan Grameen Bank branch leh pisa 37 vel beih leh hal a ni tawh a, Thawhlehni zan bikah ringawt pawh khan 14 beih a ni tih bank chuan an sawi.
Bank hi Hasina-i paih thlak a nih hnua Bangladesh-a sorkar lailawk ding hruaitu, Nobel Prize dawng tawh, Muhammad Yunus-a din a ni a, Hasina-i tantute hian an bei bik riau a ni.
Dhaka Metropolitan Police chuan phal lohva pun khawm kaihhnawihah mi 71 vel an man tawh a, heng zingah hian Awami League leh an hnuaia pawla tel tam tak an awm tih police thupuangtu, Niaz Mehedi chuan a sawi.
Thawhlehni khan Home Minister Salahuddin Ahmed-a chuan ram pawna awm Awami League hruaituten Bangladesh chu tihderthawna buaina siam tura an mite fuihah a puh a, a mawhphurtute chu tute nge an nih hriat tuma an beih zel tur thu leh an hrem ngei tur thu a sawi.
Awami League hruaitute hi a tam zawk chu an sorkar paih thlak a nih rual khan an biru zui nghal a, home minister-in a puhna leh buaina awm mekah hian engmah sawi an la nei lo.
Hasina-i haw tum vanga buainaah Bangladesh venhimna tikhauh

