Prime Minister Narendra Modi chu nataka beiin Congress president Mallikarjun Kharge chuan inthlan a zawh fel hunah mipuite chuan ‘dawt hmanga inthendarhna leh inhuatna sawitu’ PM angin an hre reng tawh dawn tiin a sawi.
Kharge chuan Prime Minister chu ‘hate speeches’ a innghat lovin tun hnai kum sawm a sorkar hnathawh hmanga vote zawng zawk turin a ngen bawk a.
Congress president chuan Prime Minister Modi hnenah hian lehkhathawnin PM-in NDA candidate te hnena Lok Sabha inthlan thawh hnihna neih zawh fela Congress a beihna te chu a chhang let a ni.
Prime Minister Modi chuan BJP kaihhruai NDA candidate-te chu Congress tena ‘SC, ST leh OBC community te rights laksakin an vote bank te hnenah pek a tum’ tih thehdarh turin a ti a ni.
Mimal tinte lehkha a thawnah Modi chuan Congress leh an thawhpui te chuan sakhuana behchhana reservation siam chu Constitution in a remti lo chungin inthenhranna kalpui an tum a ti bawk a.
Modi chu chhangletin Kharge chuan, “NDA candidate te hnena i lehkhathawn ka hmuhin leh mipuite hnena sawi tura i duh te i hrilhnaah i thuziak hmang atangin hlauhthawnna leh beidawnna i nei tih a hriat a, chuvang chuan Prime Minister tih atana mawi lo tawngkam i hmang a ni,” tiin a sawi.
“I lehkhathawnte chuan i dawt sawi ten a den tur ang deng lovin i hriaa chuvangin i candidate te chu i dawt sawi thehdarh nasa turin i ti a ni. Dawt chu vawi sang tam pawh sawi nawn ila thudik a nih phah thei ngai chuang lo” tiin Kharge chuan a ziak a.
Congress chief chuan voters te chu an fing tawk tia sawiin Congress tena manifesto a kan ziah lan leh kan thutiamte chu an hrefiah a ni a ti bawk a.
“Kan guarantee te chu a mawlmangin a fiah em em a, sawifiah pawh a ngai lo. I lo hriat atan kan sawi nawn leh ang e” tiin Kharge chuan PM Modi hnena a lehkhathawnah party Yuva Nyay, Nari Nyay, Kisan Nyay, Shramik Nyay leh Hissedari Nyay te chu a ziak lang a.
“Nang leh Home Minister tena Congress ten mitihlawm politics an kalpui intih dup dup te kan lo hria e. Mitihlawm policy tun hnai kum sawm chhunga kan hmuh chhun chu nang leh i minister tena Chinese te intihlawm chauh a ni. Tun thlengin China chu ‘Ghuspaithiye’ pawh i la ti duh lo va, chutih ahnekin June 19, 2020 khan ‘Na Koi Ghusa Hai, Na Hi Koi Ghus Aaya hai’ tia sawiin Galwan a India sipai 20 te ram tana nunna hlantute i hmusit a ni” tiin Congress chief chuan a ziak lang bawk.
“China thiam chang zawka i chhuah chuan India a tichak lo zual zel a ni. China-in Arunachal Pradesh, Ladakh leh Uttarakhand LAC ah te military infrastructure a din belh zel laiin India in Chinese bungrua a chawk luh chu tun hnai kum 5 chhungin 54.76 per cent in a pung bawk a, kum 2023-24 ah USD 101 billion a kai tawh” tiin a sawi bawk.
NDA candidate te hnenah SC, ST leh OBC reservation chu chhuhsakin Congress vote bank te hnenah pek an ni ang i ti a, tia sawiin Kharge chuan, “Kan vote bank chu Indian tin te – rethei, hnuaichhiah, hmeichhia, thalai, labour class, Dalits leh Adivasi te an ni. Mitin ten RSS leh BJP te chu kum 1947 atanga reservation dodal zawk an nih an hria,” tiin a ziak lang bawk.
“In hruaitu ten an sawi lan fo a ni a. Eng vangin nge Constitution Article 16 duhdan anga population behchhana SC, ST leh OBC reservation inpawm duhlohna chhan i sawifiah a ngai” tiin Kharge chuan a sawi bawk.
“I lehkhathawnah mipuiten rim taka an thawhchhuah te chu laksakin sem ral a ni dawn i ti a. He hun remchang hi lain in party chu Gujarat a Dalit farmer te tana dah Rs 10 crore laksaka electoral bond hmanga BJP hnena pek chu peklet tir turin ka ngen che a ni” tiin Kharge chuan ngenna a siam zui bawk.
BJP te chuan dan kalh leh constitution kalhin Electroal Bonds hmangin Rs 8,250 crore an dawng tiin a sawi bawk.
Congress te chuan Inheritance Tax lak an tum tia i sawi chu dawt a ni a, a nihna takah chuan BJP finance minister leh BJP party leader te chu Inheritance tax duha au au zawk an ni a ti bawk a.
“I lehkhathawn ziah atangin inthlan thawhkhatna leh thawh hnihnaah vote tla a chhiat avangin i hlauthawng a ni. A lantir zawka chu mipui ten in policy leh in campaogn speech te ah tuina an nei lo. Nipui khawlum tak vanga vote tlachhia a ni lo va, mirethei te chu in policy in a kang alah zawk a ni” tiin Congress chief chuan a sawi bawk.
Kharge chuan Prime Minister chuan intluktlanlohna nasa zual zel te, unemployment te leh thil man sang zual zel mipuite nghawng natak te chu a sawi duh ngai lo a ti bawk a.
Congress manifesto chuan ‘Nyay’ justice a aupuia society tinte hmasawnna a thlen dawn a ni, tiin Kharge chuan a sawi bawk.
‘Hate Speech‘ ni lovin sorkar thiltih that hmangin vote zawng rawh tiin Kharge an PM Modi lehkhathawn
