India Meteorological Department chuan tun atanga ninga chhungin Rajasthan, Punjab, Haryana leh uttar Pradesh ah te heatwave a thleng dawn tia sawiin ni li chungin Madhya Pradesh leh Bihar-ahte heatwave a thleng ang a ti bawk.
Weather agency te chuan mercury chuan May thla hian India ram hmun tam takah 45 degree Celcius a hawlh dawn tiin a sawi bawk.
Senior scientist Dr Naresh Kumar chuan, “April atanga ni hnih thum kalta mai thleng khan western disturbances te chuan Northwest India a chiah hneh hle a, chuvang chuan Jammu and Kashmir, Himachal Pradesh, Uttarakhand ten ruahtui tlem an hmu a. Hei vang hian temperature a sang vak loh phah a ni. May thlaah hian hmun tam takah temperetaure in 45 degree Celcius a hawlh dawn a. Vawiinah ngei pawh Rajasthan-ah chuan temperature in 45 degree Celcius a hawlh a ni” tiin a sawi.
“Punjab leh Haryana-ah pawh temperature in 44 degree Celcius a hnaih thuak a, Uttar Pradesh-ah heatwave dinhmun a thleng lek lek a. Tun atanga ninga chhungin Rajasthan, Punjab, leh Uttar Pradesh-ah te heatwave a thleng ang a, ni li chhungin Madhya Pradesh leh Bihar-ah a thleng bawk ang a, chumi hnuah chuan temperature ziaawm deuhin a tlahniam ang” tiin Kumar chuan a sawi.
Chhimlam state-ah thung chuan, “Tun atanga ni nga chhung velin Tamil Nadu, Kerala leh South Karnataka ah ruah nasa takin a sur thei” tiin a sawi bawk.
MeT department chuan weather advisory tichhuakin heatwave turu tak Northwest India leh Bihar-ah a thleng thei tiin, mipuite fimkhur turin an ti a, chutiang bawkin May 18 atangin East leh Central India-ah khawlum zual nasa takin a thleng thei a ti bawk.
MeT deparment chuan may 23 atangin south Peninsular India ah ruah nasa takin a sur thei a ti thung.
Heatwave in India nuai dawn ti
