High school zirlaite eizawnna
kawng dap zui dan an hrilhzau
Directorate of SCERT buatsaihin Aizawl khawpui chhunga sawrkar enkawl high school-te pualin Thawhlehni khan career awareness campaign buatsaih a ni a. Resource person-ah Lalhriatzuala (Chiko Coaching Centre) leh Lalhruaitluanga (Zocareer Solution) ten zirlaite hi eizawnna chungchang an hrilhzau.
Hmanpuitu School Education minister Dr Vanlalthlana chuan, sawrkar hna chauh hi ‘hna’ a nih loh zia hrechiang turin a duh tih a sawi a. Mahni thiamthil hmanga mahni kea ding tur leh eizawnna tlak tura an thiamna tuaihriam turin a fuih. Eng hna pawh thawk dawn se, lehkha zir that a ngai tih sawiin, mahni kea ding tur pawhin taima taka lehkha zir a ngai tih a sawi a ni.
Educational and Vocational Guidance and Counselling Cell SCERT hi kum 1981-a din a ni a. He Cell hmalakna hian career awareness campaign hi Aizawl district bakah Mizoram khaw hrang hrangah kum engemawzat kalpui a lo ni tawh thin. Zirlaiten eizawnna tur leh zirna an kalpui zel dan turah ruahmanna siam dan, mizia leh tui zawng mila subject stream thlan thiam, mahni kea ding theia kawng zawh tur thlannana ruahmanna siam dan leh eizawnna kawnga hlawhtling tura thil pawimawh hrang hrang bakah vocational education leh skill training chungchang zirlaite hrilhhriat chu a tum ber a ni.
High school zirlaite eizawnna kawng dap zui dan an hrilhzau
