Mizoram larsap Dr Hari Babu Kambhampati chuan Thawhtanni khan Raj Bhavan-ah Padma Shree dawngtu C Kamlova a kawm a. Mizoramah Hindi zirtirna chak zawka kalpui theih dan tur an sawidun.
Larsap chuan C Kamlova thawhhrima leh Hindi zirtirna kawnga hma a lo kak tawhna chu fakawm a tih thu a sawi a. Mizoramah thalaiten Saptawngah harsatna an neih loh laiin, Hindi tawngah erawh hmasawnna tur an nei nia a hriat thu a sawi. “Mizo thalaite hian theihna sang tak an nei a, an thiamna behchhan hian India ram khawi hmunah pawh eizawnna tha tak tak an hmu thei a. Hindi tawng erawh an thiam tel a tha a ni,” a ti.
Mizo thalai zingah Hindi tawng thiam chak an tam chu vanneihthlak a tih thu a sawi a. State thenkhatah Hindi zir duh lo leh dodaltu an awm laiin, Mizo thalaite chuan Hindi thiam pawi an tiloin a tangkaina an hria tih a sawi a ni.
Padma Shri C Kamlova hnenah hian tun dinhmuna sikul naupangte hnena Hindi zirtirna kalpui dan larsap hian a zawt a. Hindi Prachar Sabha hmalakna pawh a zawt tel bawk.
Padma awardee chuan larsap-in Hindi zirtirna uar tura hmalakna kalpui a duh chu thil phurawm tak a ni tih a sawi a. Tunah hian sikulah Hindi zirtirna tha taka kalpui a nih rualin, mipui nawlpuiin Hindi zir tur chuan hmalakna thar a ngai niin a sawi. Hemi chungchangah hian proposal siam a ni tawh tih sawiin, chu proposal chu Mizoram sawrkar pawhin a pawm tawh a, tunah hian North Eastern Council hnenah Art & Culture department-in a thawn tawh tih a sawi a ni.
He proposal ang chuan, Hindi zirna turin lehkhabu buatsaih a ni dawn a, lehkhabu hi a thlawnin school, NGO leh a duhtute hnenah sem tura ruahman a ni. Kumtin NEC hnuaiah India hmarchhak huamchhunga Hindi zirtirna atan sum dah hran a ni a, chumi behchhan chuan proposal hi siam a ni. Hindi zirtirna atan proposal, Mizoramin NEC-a a thehluh tak chu pawm a nih theihna’n larsap chu hma la turin a ngen nghal a ni.
Hindi zirna lam uar dan tur sawi dun
