Hindutva hnuaiah development hmangin BJP-in Zoram min run – Rosiamngheta

Hindutva hnuaiah development
hmangin BJP-in Zoram min run
– Rosiamngheta
Hindutva hnuaiah development hmangin BJP-in min run mek a, hmasawnna duh avangin kan Kristianna kan kalsan a hlauhawm tih Congress hruaitu Rosiamngheta chuan a sawi.
Thawhtannia Congress Bhavan-a inkhawmah AMC corporator Rosiamngheta chuan, India ram danpuiah ‘secularism’ a tel theihnan India rama kohhran hruaitu hmasaten an lo nawr ngar ngar a, 42 Amendment-ah Congress-in danpuiah a thun ta a. Tunah secularism a nghing tan a, danpui atanga paih tumin BJP-in hma a la mek tih a sawi.
India chu ‘India’ tia hming vuah a nih hma in Kristianna a lut tawh a, AD 52-ah Tirhkoh Thom-a’n India a rawn thleng a, a martar nghe nghe tih a sawi a. Hindu leh Sindhu tih tawngkam chu Persia tawng, an tobul Mohenjodaro pawh Pakistan-a awm a nih avangin, BJP-in Kristiante chu foreign sakhua tia sawi tawh lo turin a chah tih a sawi.
“Congress hi kan tha ber kan ti lo; mah se, kan innghah chhan hi Kristianna a ni a, a tir atangin Kristian-ten India thatna turin hna an thawk ngar ngar zawk a ni,” a ti.
Mizo Kristianten kan hmakhua kan ngaihtuah a ngai takzet tih Congress hruaitu hian sawiin, BJP chuan Mahatma Gandhi hming nawhreh tumin hma an la ngar ngar a. An hotu thlak ve thin mah se, an ideology – Hindutva leh development an thlak ve ngai loa, tunah Mizoram pawh an rawn bei ngawrh dawn tih a sawi a ni.
“BJP hi kan tlan khalh a ngai. Hmasawnna kan duh avangin kan Kristianna kan kalsan ang tih a hlauhawm. Kan ram hi BJP Hindutva hnuaiah development hmangin min run mek a, Muslim hoin thil dang hmangin min run ve bawk. Politics kan khelh chhan chu he hnam hi dinchhuah tir kan tum vang a ni a, kan harh a hun takzet tawh,” a ti.