Rome hnehtu Sinner
Kum 25 em pawh a tlin hmaa Grand Slam title panga leh ATP Masters event title 10 la tling der tawh Jannik Sinner chuan mipa tennis record buah a hming a ziah belh leh ta a, Pathianni zan Italian Open final-a Norway chhuanvawr Casper Ruud a hneh chiah khan ATP Masters 1000 title an chuh thin pakua a la kim ta vek a, ‘career Golden Masters’ an tih chu a nghak chhuak ta a ni.
Mipate zinga ‘career Golden Masters’ nei awmchhun ni reng thin 24-time Grand Slam champion Novak Djokovic-a record pakhat a nihrualpui leh ta a ni.
Kum 24 mi Italian hian a chipuite hmaah Rome final-a a hmachhawn Ruud kha harsatna lian tawk lo zawng 6-4 6-4-in a hneh a, Grand Slam tournament tih loha tennis inelna level sang ber Masters title paruk a la zawn riap bawk!
A career-a Australian Open title pahnih (2024, 2025) baka Wimbledon (2025) leh US Open (2024) title pakhat ve ve la tawh Sinner hi nikum Roland Garros final-ah khan Spaniard Carlos Alcaraz hneh loin a tlawm a, kumin hian French Open-ah champion tawh se, June ni 7 khian Coupe des Mousquetaires-ah hnehna a chang leh bawk se, mimal lawmman a lak loh awmchhun chu Olympics gold chiah a ni tawh dawn!
World number one Sinner hian men’s tour a thunun tluang rih hle a, tennis player-te major title beisei hnaivai ber ni leh mek French Open pawh hi a tisual hlete a nih chuan chuan pumbilh zui leh mai tura ngaih a ni a, Serb Djokovic-a tan chuan Grand Slam title la hnem ber ni chunga a career zial fel a harsa hlen dawn niin a lang!
Sinner hian 2023 Canadian Open kaltlangin a Masters title hmasaber kha a hlawhchhuak a, a hnu lam chu a thunun nghet zui ta hle a nih hi!
Kum 2018 Cincinnati Open trophy kha Djokovic-a tan history siama Masters title pakua a lak kim vek tum niin, khatih lai khan kum 31 mi a ni tawh a, kum 2020-ah kum 33 mi ni chungin Masters tournament pakuaah a champion kim leh bawk!
History hnutchhiah chunga Rome hnehtu Sinner
