Environment, Forest & Climate Change department hnuaia centrally sponsored scheme-a chhawr mek wildlife guard leh CAMPA hnuaia Anti Pouching Squad-ten kum khat dawn hlawh an lak theih loh avanga a changtu minister leh chief minister an dawr hnua hlawh an la tan ta chu lawmawm an tih thu Centre of Indian Trade Union Mizoram (CITUM) chuan an sawi.
CITUM State Hqrs. thuchhuak chuan, hlawh lak theih loh avangin hian Forest minister hmuh niin, theihtawp a chhuahpuina azarah leh chief minister-in ngaipawimawh taka an hlawh engemawzat a pe chu lawmawm a tih thu a sawi a. Chutihrualin la la ve lote pawhin rang taka an lak thuai an beisei a, a hun taka hlawh an lak ve zel theihna’n chak taka hma lakpui zel turin an beisei tih a sawi.
‘Tunah hian heng thawktute hian harsatna namen lo an tawk a, dawra an bat thinna pawhin bat an phal tawh lo hial a, chuvangin la la lo te pawhin rang taka an lak theih nan sawrkar hian an hmakhaw ngai taka hma min lak chhunzawm sak turin kan ngen a ni,’ a ti.
Sawrkar thar pian hma deuha kum 10 chuang Forest department hnuaia thawk tawh, chhan leh vang awm loa bante tun sawrkara Forest minister-in a lakluh sak leh chu a chungah an lawm hle tih CITUM hian a sawi a. Chutih rualin hun rei tak Forest department hnuaia a sur a sa hnuaia theihtawp chhuaha lo thawk tawhte chawlhtir tumna a awm nia an hriat thu sawiin, kalphung tharah chuan party induhsakna a awm loang tih changchawiin tumah ban sak lo turin thuneitute an ngen lawk tih a sawi a ni.
Hlawh la thei loten an lak tak avangin lawmthu sawi
