Tourism lama India ramin hma a sawn theihna tura Ministry of Tourism-in kum 2015 atanga scheme lian tak a lo kalpui tan tawh ‘Swadesh Darshan Scheme’ chu titawp mai lovin tunah hian Swadesh Darshan 2.0 tiin chhunzawm/tharthawh leh a ni a; Mizoram pawh he scheme hmang tangkai theitu atan thlan a ni.
Swadesh Darshan 2.0 hnuaia Destination Management Committee chu an chairman, Aizawl bawrhsap Nazuk Kumar kaihhruaiin nimin khan an thukhawm a, hmalak dan tur an rel a. He scheme hmanna turte hi Aizawl chhehvel hmun pali – Durtlang Sakeikhawthlir, Melthum, Hmuifang leh Samlukhai te ruahman a ni a.
Swadesh Darshan Scheme hmasa zawk hnuaiah khan Mizoram pawhin project pahnih a lo dawng tawh a. Eco tourism hnuaia project kha tha taka thawh a nih laiin, component 11 zet awmna adventure tourism hnuaia project erawh tun thlengin a hlawhtlinna hmel hmuh tur a awm ta lo a. Project component 11 zinga pahnih ropeway leh skywalk phei chuan sawi a hlawhzui ta zel a nih hi.
Swadesh Darshan scheme sum hi sawrkar laipuiin a vaia a tum a ni a, keini chuan a hmunhma lo ruahman a, lo thawh mawlh mawlh kha kan tihtur a ni mai a. State pachhe tak kan nih dan te, chutih ruala leiba ngah em em reng mai kan nih dante hi a hrechiangtu chu ram hruaitute hi an ni. Chutih laia sawrkar laipuiin hmasawnna hnathawhna tur sum, matching share pawh ngai lo min rawn pe thin a, kan lo hmang tangkai thei lo (duh lo?) hi chu a pawi thin hle.
Tuna Swadesh Darshan 2.0 scheme hi a tangkai thei ang ber kan hman theih nana lo hlawhtlinpui ngei turin tun atang hian insang phek thei ila. ‘Mizoram hian tourism potential a nei tha’ tia sawirikna hi a rei tawh hle a; chumi belhchhahna tur project kan hmuh ang ang hi chu hlawhtlinpui ngei tura tan kan lak thar a ngai a ni.
Hlawhtlinpui tawh ila…
