Hlawkna tel thei cooperative society sang khat tal din rawtna kan thehlut – Cooperation minister

Hlawkna tel thei cooperative society sang khat tal din rawtna kan thehlut
– Cooperation minister
Cooperative society chu state economy tithang theitu an nih avangin Mizoram sawrkar chuan hlawkna tel thei cooperative society 1000 tal din tura rawtna sawrkar laipuiah an thehlut tawh tih Cooperation minister PC Vanlalruata chuan a sawi.
Mizoram State Cooperative Union chuan Ningani khan annual general assembly vawi 37-na an hmang a. Hmanpuitu Cooperation minister chuan, cooperative society-te chu state economy tithang theitu an ni, tiin, hma an sawn zelna atan Mizoram Cooperative Joint Mission hnuaiah ‘profit-making cooperative society’ 1000 tal din tura rawtna Ministry of Cooperation-ah an thehlut a, society tinin annual turnover rate cheng vbch. khat tal neih theih an inbeisei tih a sawi.
Hemi anga an hlawhtling thei a nih chuan member-te income pawh zaa zaa a pun tur thu sawiin, he mission-ah hian kum 3 chhungin cheng vaibelchhe 303 hman theihna tur proposal thehluh a ni a. Mission hi a hlawhtlin chuan Mizoram society-ten hmasawnna rahbi thar an chuangkai ngei dawn tih a sawi a ni.
Sawrkar laipuiin White Revolution 2.0 initiative (bawnghnute tharchhuah tihpun) a kalpui mek bawhzuina atan Mizoram sawrkar chuan MULCO (Mizoram Milk Producers’ Cooperative Union Limited) leh NDDB (National Dairy Development Board) chuan MoU a ziak tawh a. He inremna kaltlang hian bawngpui tha 1000 tal kum thum chhunga lakluh theih a, MULCO-in bawnghnute a tharchhuah pawh litre 15000 chuanga a pun theih beisei a ni tih a sawi.
MULCO tihchangtlun zual tumnaah cheng vaibelchhe 24.10 (central tum vbch. 16.78 leh state sawrkar tum vbch. 7.32) ruahman a ni tih a sawi bawk.
Silk Samagra 2.0 scheme hnuaia ‘Integrated Muga Silk Development Project’ atan cheng vaibelchhe 5 pawm a ni tawh a; ‘Integrated Sericulture Post-processing Hub’ atan cheng vaibelchhe 125 budget atan ruahmanna siama thehluh a ni tawh tih minister hian a sawi a ni.
Cooperation commissioner & secretary Udit Prakash Rai pawhin, Cooperation department chu department dang nen an thawkho tha a, Mizoram Cooperative Apex Bank-in scheduled bank status a nei ta chu Mizoram cooperative society tana mel lung pawimawh tak a ni tih a sawi. Kum 2047-ah chuan Mizoram GDP 10% chu cooperative society-ten an thawhchhuah theih a beisei tih a sawi bawk.
Mizoram State Cooperative Union hi Mizorama state level cooperative society zinga upa ber niin, kum 1975 khan din a ni a. Mizorama cooperative society ho hnena zirtirna a tul ang pe tura din a ni.