London 2012 leh Rio 2016 Olympic Games-a Great Britain tana men’s singles gold medal lo awrh tawh Scot Andy Murray chu Miami Open a khelh laiin kheimit hliamin a tlakbuak a, a chawlh deuh vang vang rih a ngaih tur thu a sawi.
Kum 36 mi hi Pathianni Miami Open inkhel pakhata 5-7 7-5 7-6 (7-5)-a Tomas Machac a hneh loh tum khan a intina a, khelmual chhungah enkawlnate a han dawng bawk nain a kheimit hliam chu endik a nih hnuah kheimit hliam nghah deuh ngai chi ‘full rupture of anterior talofibular ligament (ATFL) leh near full-thickness rupture of calcaneofibular ligament (CFL)’ an tih ang chi a nih thu nemngheh a ni a, engtia inenkawl chhoh zel tur nge tih ngaichang turin specialist a rawn zui leh dawn tih a tarlang tel.
Grand Slam title pathum la ve tawh Murray hi kum 2019 khan a khel bawr hliam zai a lo ni tawh a, chu natna khum atanga khelmual a kirleh hnu lawkah hliam dangin a tlakbuak zui leh ta a ni.
May thlaa kum 37 kai chho ve tawh tur Murray hian kumin kumtir te khan tun nipui thawt laia tournament hmachhawn tal vak a tum loh thu a lo sawilawk tawh a, chutih rualin, a chawlh hma ngeia Olympic Games inelna vawikhat tal luhchilh leh a tum thu a tarlang tel a, tuna a hliam hian a beiseina a tibuai pha dawn em hriat theih a ni rih lo.
A ruahman lawk dan chuan kan hma lawk May ni 26 atanga Roland Garros hmuna khelh chhoh leh tan tur French Open-ah hian a tawpna atan a inlan leh ang tih a ni a, a hliam tan atangin chawlhkar kua a la awm a, inpeihchhuak hman turah ngaihsak phawt ang!
July ni 1 atangin vawihnih a champion ve tawhna Wimbledon an tan dawn a; a hmachhawp dang Olympics chu July ni 24 atangin Paris-ah an tan dawn bawk a, Olympic men’s singles lama Direct entry chang tur chuan ATP ranking lamah June ni 10-a top 56 luah hman a ngai dawn.
Murray hian a ranking zawn atangin a beisei pha lo mai thei a, mahse, inhnukdawk neuh neuh an awm leh ngei a rinawm avangin qualify theihna kawng la awm tura ngaih a ni a, Olympic champion leh Grand Slam winner a lo nih ve ve tawhna zawnah ngaihnathiamna a dawng thei bawk ang.
Tuna a hliamin a tlakbuak hmaa Miami Open last 32 a thlen phak avang khan Murray chuan ATP rankingah 59-na a hawlh a, a bawksawp leh chhung hian a tlahniam leh rih tura ngaih a ni
Hliam vanga chawl rih tur Murray
