Ningani zan khan UEFA Conference League – League stage khelh chhunzawm a ni a, hmahruaiatu Chelsea chuan an mualah awlsam takin hnehna an chang a, an hmahruaina an sawh nghet. Awlsam taka Chelsea an chak laiin team lian zinga mi Fiorentina an chak zo lo thung.
London club lian Chelsea hian Stamford Bridge-ah Nothern Ireland club lian Shamrock Rovers an mikhual a, an mualah 5-1 in hnehna an chang. Blues tan hian Marc Guiu chuan hattrick a siam.
Chelsea tan hian Marc Guiu chuan minute 22-naah hmahruaina goal a thun. Guiu goal thun hnu hian Shamrock Rovers in mak tak maiin goal an thun ve thuai a, Markus Poom chuan minute 26-naah goal thunin an si phurh a sut.
Mikhual team in goal an thun hian Chelsea a cho thinrim a, goal li ngawtin an chhanglet. Blues tan hian hmahruaina goal thuntu Marc Guiu chuan minute 34 leh 45’+3-ah te goal thun belh lehin hattrick a siam a. Blues tan hian Kiernan Dewsbury-Hall chuan minute 40-naah goal a thun a. Second half-ah Marc Cucurella chuan an goal ngana a thun zui leh bawk a, an mualah awlsam takin an chak zui ta a ni.
Europa Conference league khel zingah Chelsea hi team lian fal an ni a. Champions League khel awm tak niin, UCL hnuai, hnuai leh Conference League an khel a, hmahruai awm reng an ni. Hmahruaitu ni awm tak an nih ang ngeiin vawi ruk an khelh tawhah an la chak vek a, point 18 hmuin hma an hruai fal. Chelsea in an hneh tak Shamrock Rovers pawh an khel chhe lem lo viau a, khelh ruk atanga point 11 hmuin 10-naah an awm mek.
An mualah awlsam taka Chelsea an chak laiin Italian club Fiorentina chuan Mimualah hnehna an chang zo lova, mualneitu Guimaraes nen 1-1 in an inhnehtawk. Fiorentina hian pathumna an luah chhunzawm tho thung.
Hmahruaitu Chelsea an chak awlsam
