Hmalam panin Sabalenka kal zel

Hmalam panin Sabalenka kal zel
Belarus star Aryna Sabalenka chuan second round match-a a tumpui Spain nula Jessica Bouzas Maneiro lakah 6-3 7-5 hnehna changin, kum 1997-99 chhung champion Martina Hingis hnu lama Melbourne Park-a title vawithum la zawn thei hmeichhe player hmasaber nih a tumna kawngah hma a sawn leh hret.
Rod Laver Arena inkhelah top seed Sabalenka hi world number 54 tan a khawng mah mah a; third round lamah a lut leh ta phawt.
Belarusian Sabalenka hian hardcourt major bikah match 16 a chakzawn tling chiah a ni.
Two-time Melbourne defending champion Sabalenka hian world number one ni chungin season bul a tan a; he hmuna vawihnih bawk champion ve tawh dang Naomi Osaka pawh chiang zeta set hmasaber hloh chungin Karolina Muchova lakah 1-6 6-1 6-3-in a comeback a, third round a luh lawmna tiat zetin an intum hnuhnung vawihniha Muchova laka tlawm tawh a nih avangin phuba lakna rilruin a chiah hneh zawk hial awm e!
Nilaini second round inkhel dangah kum 22 mi Qinwen Zheng of China chu unseeded German Laura Siegemund lakah 7-6(3), 6-3-in a tlawm a, he thu buatsaih lai thleng hian women’s draw-a tla hraw ber a ni rih.
Chinese fifth seed Zheng hian kum 2014 daih tawha Melbourne Park title hawntu a chipui Li Na hnungzui a tumna kawngah world number 97 Siegemund kha harsatna lian tawk loa a paltlang rinna a lian a, mahse, lunghnur takin khelmual a chhuahsan ta zawk a ni.
German veteran Laura Siegemund laka rin loh taka tlawm Olympic singles gold medallist Zheng hian Australian Open second round a paltlang zawh loh hnu ah a ‘day’ a ni lo tih a sawi.
Nikum US Open final-a Sabalenka laka tlawm Jessica Pegula chu third round lut zingah telin, American seventh seed Pegula hian Margaret Court Arena-ah Belgian Elise Mertens chu 6-4 6-2-in a hneh a; inkhel dangah Tokyo Olympics champion Belinda Bencic pawhin 6-1, 7-6(3)-in Suzan Lamens a paltlang a; Olga Danilovic chuan rinkai zawk 25th seed Liudmila Samsonova lakah 6-1 6-2 hnehna a sualchhuak nawlh bawk.
14th seed Mirra Andreeva pawh Japanese Moyuka Uchijima laka 6-4 3-6 7-6(8) hnehna changin third round lut zingah a tel a; Russian tleirawl kum 17 mi hian nikum khan a Melbourne Park debut-ah last-16 thlengin, kumin hian a thlen chin atangin hma sawn zo tak ang maw!
Tomas Machac chuan 3-6 7-6(1) 6-7(5) 7-6(4) 6-4-in big-serving Reilly Opelka a paltlang ve bawk.