Hmarcha lei duh tifel thawkhat – K Sapdanga
Mizoram sawrkarin thlai thlan bik a lei tur zing ami hmarcha leikhawmtu tur chu sawrkarin a tifel thawkhat tawh tih Home minister K Sapdanga chuan a sawi.
Hualtu khua in kum 400 a tlin leh YMA Hualtu Branch-in kum 50 a tlin chu Ningani khan ‘Hualtungamtawna Run’ ah hman a ni a. Home minister bakah hian bialtu MLA, minister PC Vanlalruata ten an hmanpui.
Sawrkarin a buaipui ber chu an flagship programe Bana Kaih/ thlai thar lei a ni tih a K Sapdanga hian a sawi a. Kum tam tak kaltaah khan Hualtu khua hi khaw intodelh a lo ni tawh a, buh leh thlaiah khaw dang ngai loa intodelh thei an ni, tiin, “Sawrkar policy tihlawhtlingtu tur khua in ni a, sawrkarin thlai thar a thlan bik hmarcha leh sawhthing phei chu in hlawkpui ngei ka beisei,” a ti.
Hmarcha lei duh tih fel thawkhat a ni tawh a, thlai dang pawh sawrkar lamin a leitu tur leh a hralhna tur a buaipui mek tih Home minister hian sawiin, Bana Kaih policy leh CM Special Package hmangin kuminah bul an tan a, kuthnathawktute huan lo ram thleng phak tanpuina an hmuh ngei a beisei a, chu chu ZPM sawrkar tum ber pawh a ni tih a sawi.
Agriculture minister PC Vanlalruata pawhin zikhlum leh tomato-a Aizawl khawpui chawm mektu Hualtu chu khaw taima tak ni zel turin a duh tih a sawi a ni.
Hmarcha lei duh tifel thawkhat – K Sapdanga
