US pa, hmarcha thak ngam zet mai Greg Foster chuan second 30 chhungin hmarcha thak hmingthang, Bhut Jolokiya pum 10 a ei zo hman a, Guinness World Record a siam. Bhut Jolokiya hi North East India, a bikin Manipur leh Assam-ah te an ching uar a, Ghost Pepper ti te pawhin an sawi bawk a, khawvela hmarcha thak ber te zinga chhiar tel a ni.
Greg-a hi hmarcha thak ngama hming chher a ni ve reng reng a, December 2021 pawh khan khawvela hmarcha thak bera sawi Carolina reaper chu second 8.72 chhungin pum thum a ei zo a, Carolina reaper pum thum ei zo rang thei ber record a lo siam tawh a, 2017-ah khan minute khat chhungin Carolina reaper gram 120 a rit ei zo vekin record a lo siam tawh bawk a ni.
Hmarcha thak dan tehna hi Scoville Heat Unit an ti a, hmarchapui kan tih ang chi ho hi SHU 5,000 vela thak a ni tlangpui a, Bhut Jolokiya hi chu SHU 10,00,000 vel a thak a ni tlangpui. Carolina reaper hi khawvela hmarcha thak bera chhal thin a ni a, SHU 16,40,000 vela thak a ni tlangpui a, mahse, nikum khan hei aia hmarcha thak zawk Pepper X an siam chhuak a, he hmarcha thak dan hi chu SHU 26,90,000 daih a ni!
Hmarcha thak ngam record siam
