Hmarchhak sumdawngten Union Budget 2026-27 fak

Hmarchhak sumdawngten Union Budget 2026-27 fak
Hmarchhaka sumdawngte chuan Union Budget 2026 pharh tak chu tha an tih thu sawiin hmasawnna thlenna tur niin an sawi.
Budget pharh takah hian inthlan hmabak leh hmarchhaka state lian ber, Assam tana sum ruahman bik a awm lo va. Tourism, inpawhna, sumdawng tenau leh hmasawnna ruhrel dinna tur tam tak erawh telh a ni a; mi thiamte chuan miin rorel lai, BJP an ngainat theihna tur tam tak a inphum niin an sawi.
Heng hmalakna turte hian hmarchhaka mite tan hna tam tak a siam thei dawn nia ngaih a ni.
Budget-ah hian sumdawng tenaute chu suma tanpuina tur siam a ni a, a hmaa mi aiin a tam zawk dawn bawk a. ‘SHE Mart’ tia sawi programme thar chuan hmarchhaka hmeichhiate chawi kanna tura ruahman a ni.
Hmarchhak thanna tur tam tak duan tar lan a ni a. India-a semiconductor hmasa ber chu Assam-a neih a nih dawn mek laiin Semiconductor Mission siam thar chuan a pui hle dawn.
“He hamthatna hian India hi semiconductor-a sumdawnnaah a siam lian dawn a, Assam-a hna thawh mek hi a pawimawh tak zet a ni,” tiin Confederation of Indian Industry (CII), Assam chapter chairman Bhaskar Phukan-a chuan NDTV a hrilh.
Indian Chamber of Commerce, North East India Regional Council chairman Mahesh Saharia chuan budget-ah hian hmarchhak tana sum hman turah bazar tihchangtlunna, lo neih tihhmasawnna tur leh sumdawng tenau chhawmdawlna tur a tel chuan vantlang khawsak a tihmasawn thei dawn tih a sawi bawk.
Chamber hian Siliguri leh Varanasi inkara rel tlan chak chi tlantirna tur leh hmarchhaka electric bus 4,000 tlantirna tur ruahman pawh vantlang inkalpawhna leh rei tak daih tur hmasawnna thlentu tur niin an sawi bawk.
Ministry of Development of North Eastern Region (DoNER) tana sum dawn pawh kum kal meka dah aia 47%-a tam, Rs vaibelchhe 5,915 dah niin hei hian thil tam tak thlak tura ngaih a ni.
“Union Budget-ah hian hmarchhak puala scheme tar lan ni chiah lo mah se huang hrang hrangah chhawr theihna tur a awm teuh a ni,” tiin Federation of Industry and Commerce of North Eastern Region (FINER) treasurer Dipak More-a chuan a sawi.
Scheme zinga One District One Product te, medical tourism hub siam tura hmarchhaka panga siam tur te, SHE Mart te, water tourism leh inland waterways te chu hmarchhak tihchangtlunna tura tangkai zingah a tel niin a sawi.
“Budget tha chungchuang ni kher lo mah se a pum puia lakin ram pum hmasawnna tura khairual tak a ni,” tiin More-a chuan a sawi.
FINER vice president Sandeep Khetan-a pawhin tourism tihhmasawnna tur awm chu hmarchhakin a hlawkpui thei dawn niin a sawi a. Prime Minister Narendra Modi-a’n khualzin hip thei hmun nia a ngaih thu a sawi chu a takin a chang dawn niin a sawi bawk.
Unnati scheme hnuaiah Guwahati-ah five-star hotel 15 siam a ni dawn a, Meghalaya leh hmun dangah panga paruk vel ruahman a ni bawk tih a sawi.