North Eastern Regional Power Committee (NERPC) thutkhawm vawi 31-na chu Nilaini khan Aizawlah neih chhunzawm a ni a. Hmarchhak state hrang hrang hotute leh mithiam an tel a. Energy-a intodelhna tur, kawlphetha leh infrastructure lama hmasawnna tur sawiho a ni.
Hmanpuitu Power & Electricity minister F Rodingliana chuan, Ministry of New & Renewable Energy-in tunhnaiah hmarchhak state zinga che tha ber pawl (best performing states) zingah Mizoram a puang tih a sawi a. Hman tangkai loh hausakna (untapped wealth) a nei hnem a, Central Water Commission survey report-ah hydro power megawatt 3660 siam chhuah theihna a nei a, pumped storage project-ah pawh Mw 10000 aia tam siam theihna a nei a, NISE report-a tarlan danin nizung chakna atangin gigawatt 9.09 siam theihna a nei tih a sawi. Heng theihna nasa tak Mizoram-in a neih hi a taka thar chhuah a nih zel theihnan hma lak mek a ni a, thawh hona tha a ngaipawimawh tih a sawi bawk.
NERPC chairman, Meghalaya Power minister Metbah Lyngdoh pawhin, North Eastern Region-ah transmission & distribution loss a sang lutuk chu a ngaimawhawm a, India ram average ai maha a san avangin tan lak nasat a ngai tih a sawi a ni.
Hei bakah hian hmasawnna hna thawhna atan forest hman man /tih chereu man, net present value (NPV) charge sang lutuk NE state-a forest cover ngah tan hmasawnna hna thawh a ti thuanawp nasa a, NPV senso hi sawrkar laipuiin a tum emaw, a nih loh leh, ramngaw neih tam dan azir emawa he chawi tur bituk hi tih hniam nise tiin a rawt.
NERPC member secretary B Lyngkhoi pawhin NERPC chu mipui tana kawlphetha rintlak leh man tlawm zawk a awm theihnana inrawnkhawmna hmun pawimawh ber a ni, tiin, hmasawnna hna hrang hrang thawhnaah power sector chu a hmahruaitu nih a ngai tih a sawi a ni.
NERPC thutkhawm vawi 31-naah hian hma lak ho theihna dan tur rel niin, India hmarchhaka ramngaw leh tui chakna te chu hlawk tak leh dik taka hman a nih theih dan turte sawiho a ni.
8 Tuirini Hydel Project (Mw24), NDB (New Development Bank) funded niin hna thawh tan a ni tawh a. Tuivai HEP (Mw 132) leh Tlawng HP (Mw 102) tan detailed project report peihfel thawkhat a ni tawh tih a sawi a ni.
8 December 2025 khan Thenzawl Solar Plant (10 MWp) hawn a ni a. Sumsuih-ah 5 MWp plant siam mek a nih bakah 46 MWp dang siam leh turin tender buaipui mek a ni.
8 Chite Aizawl Sub-Station leh 132kV Bairabi-West Phaileng line hawn a ni tawh a. Lawngtlai, Marpara, leh Thingsulthliah sub-station thar chu kumin March ral hmaa zawh hman tum a ni.
8 RDSS scheme hnuaiah prepaid smart metering leh aerial bunch cables (ABC) Aizawl khawpui chhungah hman tan a ni a, hei hian kawlphetha hloh tur a ti hniam dawn a ni.
8 Sawrkar laipuiah power sector bik tan gross budgetary support (GBS) chu 10% atanga 20% a dah turin leh ramngaw hman man, net present value rate sang lutuk chu tih hniam sak turin a ngen tawh a ni.
Hmarchhaka power lam hmasawnna tur sawiho
