Hmasawnna hmachhawn thiam…

Kan duh emaw, duh lo emaw, hmasawnna hian min paltlang bawrh bawrh zel a, min la paltlang zel bawk ang. Hmasawnna hmachhawn dan thiam tura kan lo inpuahchah sauh sauh hi kan tihtur chu ni berin a lang.
Computer kan hmelhriat tan tirh lai khan, ‘a hlauhawm, kan hmang ve duh lo’ ti ta tlat ila, awmzia a awm reng reng lo. Hmasawnna rahbi kan rah ve dawn chuan computer kan hman ngei ngei a ngai. Internet banking te pawh hi ka hmang ve duh lo, a tih theih ta miah loh bawk. Kan duh emaw, duh lo emaw, hun hian min hrut kal nawk nawk a, awmna ngaiah a awm reng theih loh va, kan dinhmun hi a insawn ngei ngei a ngai a, chu insawnna hmachhawn thiam tura kan rilru sukthlek hi kan dah thiam a pawimawh ta hle a ni.
Look East Policy pawh hi kum 35 kalta 1991 atang khan kan hmelhriat tan a, India sawrkarin Southeast Asia nena kawng hrang hranga inkungkaihna tha leh nghet zawk neih theihna tura a duan a nih rualin, chu chuan hmarchhak state-te a paltlang dawn miau avangin kawng hrang hranga hmasawnna ruhrel a keng tel a.
Tichuan ‘Look East Policy’ a ni reng thei ta lova, hunin ‘Act East Policy’-ah min hruai lut a, min pal bawrh bawrh a, lo dodal eng ang mah ila, barhluih kan ni tho tho. Chutih rualin, kan chan loh khanah hmasawnna lian takin min luhchilh nghal rup rup ta thin a nih hi.
Hei tunah pawh, tunhmaa kan suangtuah ngai loh, thil tih theih tur pawha kan ngaih loh kha, India ram khawpui ber New Delhi nena inthlunzawmna Rel Kawng chuan kan khawpui a rawn thleng ta der mai. A tir lamah pawl thenkhatin, chimralna kawngka inhawng anga ngaiin dodalna thawm te pawh an han chhuah ngial thin a, awmzia a awm pha lo. Chuta chhapah, rel hi Mizoram chhim tawp thleng tura ruahman a ni a, a la thleng ngei bawkin a rinawm.
Motor kawngpui leh Rel kawngin Mizoram a chhun tlang ruah dawn a, Kolkata atangin tuipui kaltlangin Mizoramah bungrua a lo lut tawh ang a, khawchhak ram hrang hrang atanga bungua pawh a lo lut bawk ang a, Mizoram chhim leh hmar tlangdung chu a ri tluk tluk tawh mai dawn a ni.
Chu hun lo thleng tur chu tun atanga kan lo thlir lawk a, a hmachhawn dan tur kan lo ngaihtuah a, kan lo inbuatsaih sauh sauh hi kan tih tur pawimawh tak chu a ni ta a ni.