Hmeichhe beiseiawm tlak belh zel

Hmeichhe beiseiawm tlak belh zel
Top seed Iga Swiatek chu Pathianni khan Jelena Ostapenko lakah tlawmin US Open fourth round a paltlang zo lo a, chawlhkar 75 chhung world number one a nihna pawh tawp tawh dawn a; Pathianni inkhel dangah number one hlui Caroline Wozniacki pawh American sixth seed Coco Gauff chuan tournament kal lai atangin a hnawtchhuak a; Thawhtanni khan hming langsar leh beiseiawm dang pahnih Ons Jabeur leh third seed Jessica Pegula pawh fourth round paltlang zo loin an tla fel ve leh.
Grand Slam final vawithum khela major title la hlawhchhuak zo lo Tunisian Jabeur hian nikum khan Flushing Meadows-ah hian final khel tawhin, kuminah Wimbledon final a lut bawk a, New York hard-court grand slam kal laiah pawh hian tlo leh tura beisei a nih laiin Chinese Zheng Qinwen chuan 6-2 6-4-in a vaw tla ringawt!
Kum 20 mi Qinwen tan tun hi a career-a Grand Slam quarter-final a luh vawikhatna niin, Belarusian second seed Aryna Sabalenka lakah fiahna dang a hmachhawn zui leh ang.
Fourth round inkhel dangah kum 2021 leh 2022 Flushing Meadows semi-finalist Sabalenka chuan 6-1 6-3-in Russian 13th seed Daria Kasatkina a hneh.
Kum 25 mi Australian Open champion Sabalanka hi a champion zo lo a nih pawhin New York tournament zawh ruala hmeichhe tennis ranking thar tarchhuah turah last 16 paltlang zo lo Swiatek luahlanin world number one nihna a luah chho dawn a ni.
Louis Armstrong Stadium-a a tlawm hma tournament tir lam khan Tunisian fifth seed Jabeur hi khawsikin tibuaiin, thawk lamah harsatna a tawk hlek a, chuti chungin hmalam a pan zel a, 23rd seed Zheng lakah rin loh takin a tlawm zui ta a ni.
Fourth round inkhel dangah champion tura rinkai dang American Pegula pawh a chesual a, a chipui Madison Keys chuan 6-1 6-3-in a sawp!
WTA Tour lamah hlawhtling teh mah se kum 29 mi Pegula hian tun thlengin Grand Slam quarter-final piahlam a la thleng zo lo tluang zel.
17th seed Keys chuan kum 2018 hnu lama a vawikhatna atan US Open quarter-final a lut a; Arthur Ashe Stadium-a a chipui nen an insut hma khan player pahnih hi tunhma lamin tumkhat chiah khelmualah an la intawng a, chu chu nikum mai kha niin, Pegula a chak a, tuntum erawh Keys a dingchang ve ta thung a ni.
Tualchhung mite innghahna lian Keys hian Wimbledon champion Marketa Vondrousova a tum leh ang.
Czech ninth seed Vondrousova hian American tum ruh zet Peyton Stearns laka set khatnaa hloh zet hnuah harsatna lian tawk zui loin 6-7 (3-7) 6-3 6-2 nen New York khuaa a vawikhatna atan last eight a lut a, inkhelh laiin a ban hliam a buaipui deuh a, kha khan semi-final luh inchuh lamah a tibuai dawn em hriat a ni rih lo.