Hmeichhe chunga hleilenna thleng tihbona tur ruahman
Hmeichhiate chunga hleilenna thleng thin tihbo kawnga hmalakna tur, Gender Based Violence (GBV) Solve Project chu Ningani khan Social Welfare, Women and Child Development minister Lalrinpuii’n a hawng.
He project hi Aparajita leh J-PAL South Asia tangdun hmalakna niin, Mizoramah chuan Mission Foundation Movement (MFM) in a kalpui dawn.
Minister chuan Mizoramah hmeichhe chunga hleilenna a pung nasa niin a sawi a. Kum 2022- 2023 chhung khan Women Helpline-ah case 3094 report a awm a, February 2025-ah chuan case 12750 a awm tawh tih a sawi. GBV tihbo lama hmalakna chu kan mamawh tak a ni, tiin, “Hmeichhe dinhmun a that chuan chhungkua a thang a, khawtlang pawhin hma a sawn thin,” a ti.
GBV Solve Project hian hmeichhe chunga hleihlenna chauh bitum loin, naupang (mipa leh hmeichhia) ten hemi chungchang zirtirna nasa tak an dawng dawn a, hmeichhe chawmdawl ngai eizawnna tlak khawpa thiamthil zirtirna a keng tel dawn tih a sawi bawk.
J-PAL hi retheihna atanga mi chawikan dan zirchiangtu research organisation a ni a. GBV Solve Project hi an organisation thil vei pakhat, hmeichhe chunga hleihlenna thleng thin tihbona atana duan niin, kum hnih chhung an zirchian hnua he project atana hma la chauh an ni tih an sawi.
GBV Solve Project atan hian proposal 470 chuang lutin, tehna hrang hrang hmanga an thlitfim hnuah India rama organization 6 he project khawih tur hian an thlang a. Heng zingah hian MFM hi a tel. MFM hian Aizawl district-a hmeichhe chunga hleilenna thleng tih bona atan mahni invenna, mipui hrilhhriat leh a tuartute enkawl kawngah Women & Child Development department nen hma a la dun ang.
Hmeichhe chunga hleilenna thleng tihbona tur ruahman
