Hmeichhe hneh tura pawimawh
Hmeichhe duh deuh i nei a, a rilru hneh theih dan tur i hre duh em? Engtin nge i tih ang? I hriat tur pawimawh hmasa ber chu hmeichhia ten tih tak tak leh tih der te hi an hre thei hle a, a lem leh tak hi an thliar thiam khawp mai. Mipa tam zawk chuan hmeichhe rilru hneh theihna a nih beiseiin tu te emaw anga awm te an tum thin a, mahse, an hlawhtling mawh khawp mai. Khai le, hmeichhia thil hre lo leh duh duha bum khual theih angah i ngai a nih chuan i tisual hle ang, a hmutlang hneh lutuk che a, i nih loh anga lan i tum pawhin a manchhuak rang khawp ang che. A pawimawh hmasa ber chu mahni nih anga lan tur a ni.
1. A hmasa berah chuan i ti leh lutuk ang e aw! Sawi dan pakhatah chuan hmeichhe rilru hneh dan tha deuh chu ngaihsak lo anga lan hi a ni an ti ve tlat. Hmeichhia chu a rilru hneh tuma an beih nasat lutukna lamah an chesual chawk a, insawitheih lamah a an kal duh khawp. Chutianga in-show-off hmeichhia ten an ngaithei tehchiam lo. Nangmah kha ni tawp la, thil chu automatic-in a lo thleng ve mai ang.
2. Hmeichhia ten sum leh pai ringawt an mitmei emaw i tih chuan i ring sual ang. I sum leh pai vanga a ngaina che a nih chuan, nangmah ni loin i pawisa chiah a duh tihna a ni. I thil neih te hmachhuan loin i pianpui finna leh thiamna te kha hmachhuan zawk rawh, chu chuan hna a thawk hlawk zawk ang. I nu leh pa te hausakna emaw i thil neih emaw avanga hmeichhe rilru hneh ai chuan nangmah i nihna ngeia i hneh khan a daih rei zawk ang.
3. Hmeichhia te hian mipa thil hrezau (inti-hria ni lovin) leh leh fing (inti-fing ni lovin) te hi an ngaisang a, chu chu hmeichhe hneh theih dan awlsam ber pawl a ni. Chutiang tura inbuatsaih thiam chu mipa tan a pawimawh hle a, lehkha chhiar tam a, hriatna tihzau tum tur a ni. Tunlai thil thleng lar deuh te chu eng emaw chen hriat ve zel tum tur a ni a, mahse, a hre ber ang hrim awm erawh a fuh lo. Thil i hriat hnem chuan titi tur i hre dawn, sawi tur hre tak leh thil sawi thiam te bula awm hi nuam an ti tlangpui a, chu chu bul tan nan a pawimawh hle a ni. Hetih rual hian amah hneh tuma thil sawi loin pangngai taka sawi theih a tha ber.
Hmeichhe hneh tura pawimawh
