Mizoramin hmeichhe MLA pathum a nei dawn
a, Assembly House-a hmeichhia an tam ber tum a ni dawn.
ZPM candidate pahnih- Lalrinpuii (Lunglei East) leh Baryl Vanneihsangi (Aizawl South III) te an tling a, MNF candidate Prova Chakma (West Tuipui) a tling bawk.
1987-a MNF candidate Lalhlimpuii a tlin hnuah 2023 inthlanah inthlanpuiah hmeichhia an tling leh chauh; a karah Vanlalawmpuii Chawngthu chu 2014-ah Hrangturzo bial by election-ah a tling a, anni hi minister niin, Lalhlimpuii hnua hmeichhe minister ni leh hmasa ber a ni.
1978-ah khan inthlanpuiah Serchhip bial atangin L Thanmawii a tling a, 1979-ah Aizawl East-ah ani hi a tling leh. 1984 inthlanpuiah Aizawl West-ah K Thansiami a tling leh bawk. Anni hi PC candidate ve ve an ni. Ruat seat-ah Saptawni leh Rokungi te an lo thu tawh bawk.
Mizoram hmeichhiate zinga minister ni thei hmasa ber Lalhlimpuii 1987 inthlana a tlinin minister a ni nghal a, minister hmasa ber dawttu Vanlalawmpuii Chawngthu pawh by-election-a a tlin kumah hian minister a ni.
2023 inthlan hi hmeichhe candidate an tam ber tum a ni a, mi 16 an ni. 2018-ah 15 an awm a, 2013-ah paruk, 2008-ah 9 an awm.
Hmeichhe candidate hi an pung ve hret hret tiin a sawi theih; UT nih hnua inthlan hmasa berah pahnih an awm a, 1978-ah pakhat, 1979-ah pahnih, 1984-ah pakhat, 1087-ah pahnih, 1989-ah pali, 1993-ah pahnih, 1998-ah 10, 2003-ah pasarih an awm.
Hmeichhe MLA pathum awm dawn
