Hmeichhe musician zinga hausa ber Taylor Swift

Hmeichhe musician zinga hausa ber Taylor Swift
Forbes-in billionaire list an tichhuak a, Taylor Swift hlutna pawh a hriat theih ta a, Swift hian Rihanna lehpelin khawvela hmeichhe musician zinga hausa ber a ni ta a, Swift hlutna hi Forbes chuan dollar tluklehdingawn 1.6 niin an tarlang.
Taylor Swift hi nikum khan official takin billionaire a ni tawh a, chutihlai chuan a hlutna hi dollar tluklehdingawn 1.1 angin an chhut a, October 2023 hnulamah a hlutna hi dollar maktaduai 500-in a pung hman a, tihian Rihanna hlutna dollar tluklehdingawn 1.4 chu khumin, hmeiche musician zinga hausa ber a ni ta a ni. Swift hi Forbes billionaire list-ah hian a pumpuiah 2,117-na a ni.
Swift hian March 2023 atanga a tan tawh Eras Tour a neih mek chu kumin December-a a khar dawn a, he tour a neih chhung hian show vawi 149 a nei hman dawn a, hei hian a hausakna pawh a tipung nasa hle a, Forbes chuan Swift hi sumdawnna dang tel lo, rimawi kaihhnawih, a hla hralhna leh performance atang ngawr ngawr a musician zinga billionaire ni thei hmasa ber niin an tarlang bawk.
Swift hian royalties leh touring atang ringawt pawhin thla 12 chhungin dollar maktaduai 600 dawn a la lut hman niin an chhal a, a music catalog hlutna pawh dollar maktaduai 600 vel a tling a, real estate lamah pawh a thil neih hlutna hi dollar maktaduai 125 vel niin an chhut bawk.
Forbes list-ah hian hmeichhe musician zinga hausa ber dawttu chu Rihanna niin, a hlutna hi dollar tluklehdingawn 1.4 niin an chhut a, Rihanna hi chuan rimawi aiin a sumdawnna dang atangin sum a la lut tam zawk.
Hmeichhe musician lar dang Beyonce hlutna hi dollar maktaduai 760 angin an chhut a, Beyonce pasal, Jay-Z chu musician zinga hausa ber niin, a hlutna chu dollar tluklehdingawn 2.5 angin an chhut ve thung.
Forbes billionaire list-ah hian musician, actor, producer, director leh infiammi atangin Le Bron James (dollar tluklehdingawn 1.2), Tiger Woods (dollar tluklehdingawn 1.2) Tyler Perry (dollar tluklehdingawn 1.4), Kim Kardsshian (dollar tluklehdingawn 1.7) leh Oprah Winfrey (dollar tluklehdingawn 2.8), Michael Jordan (dollar tluklehdingawn 3.2), Steven Spielberg (dollar tluklehdingawn 4.8) leh George Lucas (dollar tluklehdingawn 5.5) te pawh an lang.