District Legal Services Authority (DLSA) Siaha bultumin Nilaini khan Siaha-ah ‘International Women’s Day’ hman a ni.
Resource person-a hman, DLSA secretary Lalhriatpuii chuan DLSA hian inzirtirna lian pathum – legal awareness campaign, legal aid clinic leh Lok Adalat a kalpui thin tih a sawi.
Mipuiin dan kan hriatchian a tul tih sawiin, legal awareness neih chuan mi tam takin dan an hriatchian phahin dan hmangin hma an la fo thin tih a sawi a. Legal aid clinic hnuaiah ukil-te rawn theih reng an ni a, rawn thin turin a chah. Sum sen ngai loa thubuai remna tha tak Lok Adalat chu tangkai zawka chhawr a nih theih nan tan lak thar a ngai tih a sawi a. A bikin ‘domestic violence’ – kut inthlak, tawngkam chhiaa invau leh a dangah thubuai thehluh theih reng a ni tih a sawi a ni.
“Court kal hi thil nuam lo tak a ni a, amaherawh chu thil tha zawk thleng turin kan mawhphurhnaah kan ngaih ve a tul,” Lalhriatpuii hian a ti.
Hmeichhiaten sum puk an uar a, sum leh pai inpuk, pek let theih loh vangin harsatna tam tak tawh phah theih a ni tih a sawi a. Mahni hriatchian leh rintlak tak tak an nih loh chuan sum puk tir loh a him ber, tiin, a theih chin chinah ziaka chhinchhiah thlap thin turin a chah. Sum leh pai bikah court-a kal dawn chuan kum thum chhung ngeiin kal a ngai a, thuhretu tha tak neih a tul tih a sawi.
Buaina nasa zawk a awm lohnan chhungkuaah thurochhiah felfai tak siam a, hriatpuitu fel tak neih a finthlak tih DLSA Siaha secretary hian a sawi bawk a. Hei hian in leh lo bakah ro khawm dawnah nasa takin min pui thei tih a sawi a ni.
He ni puala hun hmanah hian hmeichhe pawl hrang hrang – Mara Chanô Py, Mizo Hmeichhe Insuihkhawm Pawl leh Lai Womens’ Association member-te an tel a ni.
Internations Women’s Day hi March 8-ah khawvel pumah hman thin a ni a, kumin thupui chu “Inspire Inclusion” tih a ni. Hemi ni ah hian Siahaah Mara Kut lian ‘Lyuva Khutla’ hman a nih dawn avangin March 6 hian hman a ni.
Hmeichhe pawlte hriat tur dan inhrilh
