Hmeichhe zirlaite tan football inelna

Mizoram Football Association chuan Zirtawpni khan Starlight Program hnuaiah Aizawlah One Day Girls Football Tournament an buatsaih.
He tournament hi MFA hnuaia Women’s Committee hmalakna niin, hmanpuitu acting chairman, MFA senior vice president PC Vanlalhruaia chuan Mizorama hmeichhe football chawilar leh hmasawnna turin MFA chuan hma a la zel a. Starlight Program hnuaiah sikul 11 nen thawk hoin, regular taka football training neih thin a ni tih a sawi. Hmeichhe football-ah sang tak thlen theihna kawng a awm tih sawiin, hmeichhe infiammite, an nu leh pa bakah sikul zirtirtute pawhin tih takzeta hma lakpui turin a sawm tih a sawi a ni.
Starlight Program hi Women & Child Development department, Mizoram State Sports Council leh MSACS sponsor a ni a; MFA chuan he program enkawl tur hian licensed coach pali chhawrin football training hi an enkawl thin.
One day tournament-ah hian high school 4 – Govt Mizo High School, Govt KM High School, Govt BVT High School leh Govt Central High School telin, Mizo High School an champion a; middle school 4 – Chhinlung M/S, Chaltlang M/S, Maubawk M/S leh Modern English School telin Maubawk M/S an champion a ni.