Mipa ten an nupui te emaw ngaihzawng te emaw hlimna chu hriat ngei an duh a, mahse, hmeichhia te erawhin an kawppui ten an rilru natna te leh an thinrimna te hre ve se tih an duh zawk niin relationship lama mithiam ten an sawi.
Harvard Medical School-a mithiam ten zirchianna neiin, nupa leh inngaihzawng tuak hrang hrang 156 te zingah survey neiin, hmeichhia te chuan an kawppui ten an hlimna te mipain an hriatpui hian nuam an ti a, mahse, an natna te mipain an hriatpui hian an hlimna leh lawmna an hriatpui aiin an lungawiin an lawm zawk niin an sawi.
Tuak 156 zinga 102 chu kum 40 hnuailam an ni a, a dang zawng chu kum 40 chunglam an ni thung. 71% chu vun ngo an ni a, 56% chu nupa (innei tawh) niin a dang chu inngaizawng lai an ni a, an inkawp rei tawh dan chawhrual chu kum thum leh achanve a ni. heng tuak 156 te hi thingtlang ami leh khawpui ami te an ni a, an khawsak phung te pawh inthlau tak tak an ni.
Heng tuak 156 te hi kawng hrang hranga an zirchian hnuah hmeichhia ten an kawppui te rilru sukthlek, an hlim leh hlim loh te an hriatthiampui aiin mipain hmeichhia te hlim leh hlim loh an hriatthiam pui hian inkawp te chu an hlim zawk a, mipain hmeichhe dinhmun a hriatthiampui zawh poh leh an inkar boruak a hlimawm zawk niin an sawi.
He zirchiannaa an hotu Dr Shiri Cohen chuan, “Hlim taka inkawp tur chuan kawppui te dinhmuna indah thiam a, an rilru tur awm te inhriatthiam pui a pawimawh a, a tlangpui thuin hmeichhia ten chutiang chu an thiam zawk a, chuvangin hlim leh hlim loh chu mipain thil a hriatthiam danah thui tak a innghat a ni,” a ti.
Hmeichhia ten an rilru natna te mipain an hriat thiampui hian nuam an tih zawk laiin mipa erawhin nuam a ti lo zawk ve leh tlat thung niin an sawi bawk.
He zirchianna chungchang hi Journal of Family Psychology-ah tarlan a ni.
Hmeichhia ten an natna te hrethiam turin mipa an duh
