Hmeichhiate Ni an hmang

Hmeichhiate Ni an hmang
Hmeichhiate Ni – International Women’s Day chu Thawhtanni khan Serchhip leh Thingdawlah hman a ni.
Serchhip-ah hian District Hub For Empowerment of Women DPO office Serchhip huaihawtin hman a ni a. Hmanpuitu bawrhsap Paul L Khuma chuan, tunhmain India ramah hmeichhiate dinhmun a hniam thin hle a; sawrkarin hmeichhiate dinhmun chawikang turin nasa takin tan a la a, tunah chuan Mizoramah pawh rorel khawl sang berah thu in, minister leh MLA kan nei ta tih a sawi. Khawtlang leh chhungkuaa hmeichhe dinhmun pawimawh zia a sawi a, ram siamtha turin chhungkuaah bul tan a ngai a, chhungkua khalhngil turin inchhungkhura nu ber an pawimawh tih a sawi a ni.
Hmanpuitu dang Mizoram State Commission for Women chairperson C Zodinpuii chuan, India danpui leh hmeichhiate humhalhna dan hrang hrang awm mah se, heng hi la hre lo tam tak leh la zawm lo an awm thin tih a sawi a. Hmeichhiate chu chhungkuaah eizawngtu ber leh hnathawktu ber an ni chungin hleilenna tuar an la awm fo tih sawiin, “Hmeichhe zingah inchhungkhura hleilenna tawk leh harsatna dang dang tawk tan sawrkar chuan kawng hrang hrangin ruahmanna a siam a, a thlawna biakrawn theih tur thlengin ruahman a ni,” a ti.
International Women’s Day hmanah hian Serchhip district-a hmeichhe chhuanawm pahnih – Noth East-a paediatric critical care super specialist hmasa ber Dr F Remthangpuii (E Lungdar) leh Dairei Banana Chips manager & co-founder Laltlandiki Fanai (Khumtung) chawimawina hlan an ni a. Anganwadi worker-te tana ‘teaching learning material’ insiamsiaka tithate hnenah lawmman hlan a ni bawk.
NABARD Kolasib District bultumin Thingdawlah International Women’s Day hi hman a ni a, Thingdawl RD Block BDO Dr Doris Lalrinawmi’n a hmanpui. NABARD Kolasib DDM JD Traite chuan hmeichhiate tana NABARD hmalakna leh sawrkar laipuiin hmeichhiate hamthatna tura a duan scheme – Lakhpati Didis leh Namo Drone Didi Scheme bakah hamthatna awm thei hrang hrang tarlan leh sawifiah a ni.
Thingdawl leh a chhehvel atangin self help group member-te leh hmeichhe loneitu thahnem tak an tel a. SHG member thenkhatin SHG atanga an hlawhtlinna sawiin, lawmawm an tih thu an sawi a ni.