Hmeichhiate thubuai remna
Nari Adalat Mamitah hawng
Village council level-a hmeichhiate thubuai remna tura duan Nari Adalat chu Mizorama a hmasa ber ni turin Ningani khan Mamitah hawn a ni. India rama district thlanchhuah bikah chauh hman tura duan a la ni.
Nari Adalat hawngtu Mamit district bawrhsap K Laltlawmlova chuan hmeichhiate tan court Mizorama Mamit district-a hawn hmasak ber a ni chu hmeichhiate dinhmun chawikanna ni chhinchhiah tlak a ni tih a sawi.
Women & Child Development director Zoramthangi Chhangte sawi danin, Nari Adalat hi Mizoramah a hmasa ber turin Aspirational district a nih angin Mamit district thlan a ni a. Hmeichhiaten an harsatna tawh hrang hrang rorelna sang zawk pan kher loin VC level-a chinfel theihna a ni.
Nari Adalat hi WCD Mission Shakti Scheme (Sambal) hnuaia kalpui tur niin, kum 2023 khan Ministry of Women & Child Development hnuaia din a ni. Mamit district-a khaw 10 – New West Phaileng, Lallen, Damparengpui-I, Zawlnuam Vengpui, Kanhmun, Kawrthah South, Reiek, Rawpuichhip, Kanghmun, Rajiv Nagar-I ah din a ni.
Member-te hi block development officer (BDO) kaihhruaiin VC member-te ruat an ni a. VC member bakah khawtlang tana mi rintlak leh pawimawh, zirtirtu hmeichhia, MHIP, self help group member, Anganwadi worker, YMA emaw NGO atangin member pakhat theuh ruat tur a ni.
Hmeichhiate thubuai remna Nari Adalat Mamitah hawng
