Sawhthing sawngbawlna atana Sairang Horticulture Centre buatsaih dan tur leh hmunphiah ro lei thei tur firm zawn mek chungchangah Nilaini khan Mizoram Agricultural Marketing Board chu chief minister Lalduhoma hoin an thukhawm.
Hmunphiah ro bik hi support price felfai taka kalpui a nih theihnan sawrkar hriatpui firm kaltlanga lei a ngai nia ngaih a ni a. Hei vang hian sawrkar chuan October 17 khan hmunphiah ro lei duh tur firm leh an lei ngamna zat, an lei tam theih zawng tur zawnna (expression of interest) a tichhuak a. Vawiin thlengin sumdawng (firm) 13-in an chhang tawh a, an zinga firm pathum hian sawrkar rate bituk anga an lei ngam thu an sawi.
Thutkhawmah hian huntiam chhunga sawrkar rate anga chhang ngam dang an awm loh chuan, a chhang ngam awmchhun pathum hi sawrkar hriatpuia leitu atana ruat (empanel) mai tura ruahman nise, an ti.
Sairang Horticulture Centre dinhmun sawiho a ni a. He hmun hi Sawhthing Processing Unit kalpuina atana hman diltu company pathum aiawhte nena inkawmin, unit changtlung taka chantir dan tur an duang zui a ni.
Hmunphiah ro lei duh firm 13 zingah 3 en bik
